Mae Heddlu De Cymru yn symud o orsaf Heol Berw, Pontypridd
Cynnwys y prif erthygl
Mae plismona wedi bod wrth galon Pontypridd ers i'r dref ddechrau datblygu'n gyflym yn ystod y chwyldro diwydiannol. Pan ddechreuodd y boblogaeth dyfu wrth i'r diwydiant glo ehangu, gwelwyd cynnydd yn y galw am orsaf heddlu barhaol.
Adeiladwyd gorsaf bwrpasol gyntaf y dref ar Heol Sardis yn 1845; bu'r adeilad hwn yn gwasanaethu'r gymuned tan 1868, pan ailddatblygwyd y safle. Roedd yr adeilad yn sefyll ochr yn ochr â Llys yr Heddlu, gan adlewyrchu pwysigrwydd cynyddol ardal Pontypridd fel canolfan weinyddol a barnwrol i'r cymoedd o'i chwmpas. Defnyddiwyd y safle hwn tan 1984, pan symudon ni i'r safle presennol ar Heol Berw.
Agorwyd Gorsaf Heddlu Pontypridd ar Heol Berw ddydd Llun 9 Rhagfyr 1985 gan y Cynghorydd Sir Squire, sef cadeirydd Awdurdod Heddlu De Cymru ar y pryd. Rhoddodd y Prif Gwnstabl David A East yr allwedd i'r Cynghorydd Squire er mwyn iddo agor yr orsaf newydd yn ffurfiol, a fyddai'n cael ei defnyddio fel y pencadlys adrannol newydd. Ac yntau'n gweithredu fel y prif adeilad gweithredol yn Uned Reoli Sylfaenol Morgannwg Ganol, mae'r adeilad hwn yn gwasanaethu'r dref ers 40 o flynyddoedd bellach. Mae'n gartref i'n tîm Ymateb, ein tîm Cymdogaeth, y Ganolfan Ddiogelu Amlasiantaeth, a'n huwch dîm rheoli
Fodd bynnag, mae gofynion gweithredol newidiol ac oedran yr adeilad wedi arwain at gynlluniau i newid lleoliad. Dechreuodd y cynlluniau hyn tua dechrau 2024, a symudon ni allan o'r adeilad ym mis Mehefin 2026. Mae gorsaf newydd wrthi'n cael ei hadeiladu ar Stryd y Taf.
Bydd y lleoliad modern hwn ar ffurf siop yn darparu gwasanaeth mwy hygyrch, gweladwy a chymunedol yng nghanol y dref. Mae’r gwaith ar y gweill ar hyn o bryd, a byddwn yn rhannu diweddariad arall yn y dyfodol ynglŷn â phryd bydd yr orsaf newydd yn debygol o agor.
Ni fydd hyn yn effeithio ar ein hymateb plismona, a bydd ein timau cymdogaeth yn cynnal patrolau o gwmpas strydoedd Pontypridd. Os bydd gennych chi unrhyw bryderon neu gwestiynau, ewch i siarad â nhw.
Os oes angen gwasanaethau desg flaen arnoch, ewch i Orsaf Heddlu Tonysguboriau, 1/3 Heol y Gyfraith, Tonysguboriau, CF72 8AJ, lle gallwch barhau i gael cymorth a help."
