Carcharu dyn o Bentre am nifer o droseddau rhywiol

Mae dyn wedi cael ei garcharu am nifer o droseddau rhywiol yn dilyn ymchwiliad gan Heddlu De Cymru

Cafodd David Pincott, 42 o Bentre, ei ddedfrydu i bedair blynedd ac wyth mis yn y carchar yn dilyn ei euogfarn.

Cafodd Pincott ei ddedfrydu ddydd Iau 9 Gorffennaf yn Llys y Goron Caerdydd, pan newidiodd ei ble i fod yn euog o geisio cyfathrebu'n rhywiol â phlentyn, cyfathrebu'n rhywiol â phlentyn, ceisio cyfarfod â merch ar ôl meithrin perthynas amhriodol â hi, tri chyhuddiad o greu delweddau anweddus o blentyn, a bod â lluniau gwaharddedig o blentyn yn ei feddiant.

Roedd Pincott wedi bod yn defnyddio Snapchat i gyfathrebu â dwy ferch a oedd, yn ei dyb ef, o dan 16 oed, gan anfon negeseuon yn dweud y byddai wrth ei fodd pe bai’n gallu eu gweld nhw’n noeth. Fodd bynnag, swyddogion heddlu cudd o Dîm Ymchwilio Ar-lein Heddlu De Cymru oedd y tu ôl i’r cyfrifon hyn mewn gwirionedd.

Aeth swyddogion i gartref Pincott ac atafaelu pob un o’i ddyfeisiau electronig, gan gynnwys ffonau symudol a gliniaduron. Wrth archwilio cynnwys y dyfeisiau hyn, daeth swyddogion o hyd i nifer o luniau anweddus o blant, a gwelsant fod Pincott wedi cyfathrebu â merch arall o dan 16 oed hefyd.

Dywedodd y Ditectif Gwnstabl Nichola McGill: "Roedd y lluniau erchyll oedd gan David Pincott yn ffiaidd, yn anfoesol ac yn gwbl annerbyniol.

"Mae'n warthus ei fod wedi cael pleser rhywiol o'r delweddau hyn ac mae'n profi ei fod yn beryglus i blant. Bydd e nawr yn treulio cyfnod sylweddol yn y carchar.”