Gwrthdrawiad angheuol yng Ngorseinon: Cyhuddo dyn ac enwi’r dioddefwr

Mae dyn wedi cael ei gyhuddo o lofruddiaeth yn dilyn gwrthdrawiad marwol yng Ngorseinon, Abertawe.

Mae Tyler Ford, 18 oed ac o Dreforys, wedi cael ei gyhuddo o lofruddio Ceiran Evans, 18 oed o Orseinon.

Mae Ford hefyd wedi’i gyhuddo o geisio llofruddio dioddefwr arall, ac mae wedi cael ei remandio i’r ddalfa. Bydd yn ymddangos gerbron Llys Ynadon Abertawe ddydd Llun 13 Gorffennaf.

Cafodd yr heddlu eu galw i Heol Pen Cae Crwn, Gorseinon, tua 1pm ddydd Iau 9 Gorffennaf yn dilyn adroddiad am wrthdrawiad rhwng car a beic oddi ar y ffordd.

Bu farw dyn 18 oed, a fu'n rhan o'r gwrthdrawiad.

Er nad yw’r corff wedi cael ei adnabod yn swyddogol eto, mae teulu Ceiran Evans o Orseinion yn cael cymorth gan swyddogion cyswllt â theuluoedd arbenigol.

Mae dyn 19 oed yn yr ysbyty o hyd.

Mae pedwar dyn arall a gafodd eu harestio mewn cysylltiad â'r ymchwiliad wedi cael eu rhyddhau ar fechnïaeth yr heddlu, sef:

Dyn 18 oed o Orseinon a gafodd ei arestio ar amheuaeth o lofruddiaeth ac achosi niwed corfforol difrifol o dan Adran 18.

Dyn 33 oed o Orseinon a arestiwyd ar amheuaeth o lofruddiaeth.

Dyn 38 oed o Dregŵyr a dyn 38 oed o Mount Pleasant a gafodd eu harestio ar amheuaeth o gynorthwyo troseddwr.

Dywedodd y Ditectif Brif Arolygydd Danielle Thorne o'r Tîm Ymchwilio i Droseddau Mawr: "Mae teulu Ceiran Evans wedi cael gwybod am y datblygiadau ac maen nhw'n parhau i gael ein cefnogaeth yn ystod y cyfnod hynod ofidus hwn. Gofynnwn i chi barchu eu preifatrwydd.

 

"Er ein bod wedi cyhuddo unigolyn, sy'n ddatblygiad arwyddocaol iawn, mae ein hymholiadau’n parhau i fynd rhagddynt yn gyflym, ac rydym yn apelio ar unrhyw un sydd â gwybodaeth i gysylltu â ni. 

 

"Hoffwn ddiolch unwaith eto i bobl Gorseinon a wnaeth gynorthwyo swyddogion yn y fan a'r lle a’r rhai sydd wedi rhannu gwybodaeth â ni. Rydym yn gwerthfawrogi eich cymorth yn fawr iawn.

 

"Rydym yn ymwybodol bod deunydd fideo o'r digwyddiad yn cael ei rannu ar y cyfryngau cymdeithasol, a gofynnwn unwaith eto i bobl beidio â'i rannu am resymau amlwg."

Gall tystion neu unrhyw un sydd â lluniau neu ddeunydd fideo gysylltu â Heddlu De Cymru drwy'r ddolen hon: https://mipp.police.uk/operation/62SWP26C37-PO1. 

 

Rydym yn awyddus iawn i glywed gan unrhyw un sydd â lluniau o'r ffyrdd canlynol rhwng 8am a 2:30pm ar 9 Gorffennaf:

 

⚫ Heol Pen Cae Crwn

⚫ Heol Pontarddulais

⚫ Heol Brynteg

⚫ Heol Cecil

⚫ Heol Y Mynydd

⚫ Y trac rhwng Heol Cecil a Heol y Mynydd

⚫ Heol Brighton.

 

Fel arall, gallwch ffonio 101 gan ddyfynnu'r cyfeirnod 2600218457, neu gysylltu â Crimestoppers yn ddienw drwy'r ddolen hon: Cyflwyno gwybodaeth am drosedd i elusen annibynnol yn ddienw ."