Carcharu dyn o Ben-y-bont ar Ogwr am nifer o droseddau rhywiol

Mae dyn o Ben-y-bont ar Ogwr wedi cael ei garcharu am 15 mlynedd am gyflawni nifer o droseddau rhyw yn erbyn plant

Cafwyd James Carr, 68 oed o Ben-y-bont ar Ogwr, yn euog o 10 cyhuddiad o ymosod yn rhywiol ar fachgen dan 14 oed, dau gyhuddiad o dreisio bachgen dan 16 oed a dau gyhuddiad o gyflawni sodomiaeth yn dilyn achos llys wythnos o hyd yn Llys y Goron Merthyr Tudful. Digwyddodd y troseddau rhwng 1986 a 1995, ac fe roddwyd gwybod i’r heddlu amdanynt yn 2022.

Cafodd ei ddedfrydu i 15 mlynedd yn y carchar yn Llys y Goron Merthyr ddydd Mercher 1 Gorffennaf.

Mae hefyd wedi cael ei wneud yn destun Gorchymyn Atal am oes, a bydd yn rhaid iddo gofrestru fel troseddwr rhyw am weddill ei oes.

Dywedodd y Ditectif Gwnstabl Rebecca Evans:

"Ni ellir diystyru’r dewrder sydd ei angen i gysylltu a rhoi gwybod i ni am droseddau fel hyn.
“Rydym yn gobeithio y bydd y ddedfryd hon yn helpu'r dioddefwr i ailadeiladu ei fywyd a gwella ar ôl y digwyddiadau erchyll hyn. Rydw i am ddiolch iddo fe am ddangos cryfder ac urddas drwy gydol yr ymchwiliad hwn.
“Gwnaed gwaith sylweddol ar yr ymchwiliad hwn, ac mae’r ddedfryd a roddwyd yn anfon neges hynod gadarnhaol i ddioddefwyr cam-drin rhywiol y byddant yn cael eu credu, y bydd eu hymosodwyr yn cael eu hadnabod, ac y byddant yn cael eu dwyn i gyfrif.”

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.