Annog gyrwyr i basio ceffylau yn ddiogel fel rhan o Ymgyrch Arabis

Mae Heddlu De Cymru wedi bod yn gweithio gyda phartneriaid i hyrwyddo pasio ceffylau yn ddiogel ar y ffyrdd fel rhan o Ymgyrch Arabis.

Dan arweiniad Adran Farchogaeth yr heddlu, mae swyddogion sy'n rhan o'r ymgyrch wedi gweithio ochr yn ochr â Chymdeithas Ceffylau Prydain (BHS) a Phrosiect EDWARD, sef "Every Day Without A Road Death", i godi ymwybyddiaeth o sut dylai modurwyr symud heibio ceffylau a marchogion yn ddiogel.

Fel rhan o'r ymgyrch, gwnaeth swyddogion gynnal menter gorfodi ac addysg ym Meisgyn yn ddiweddar. Dewiswyd y lleoliad yn dilyn pryderon a godwyd drwy ap "Horse i" Cymdeithas Ceffylau Prydain, a nododd fod y ffordd honno'n ardal lle cafwyd nifer o adroddiadau o ddigwyddiadau yn ymwneud â cheffylau a marchogion. Yn ystod yr ymgyrch, roedd swyddogion yr heddlu yn marchogaeth ceffylau ar hyd y ffordd heb arddangos lifrai'r heddlu, fel bod modd iddynt arsylwi ar ymddygiad gyrwyr yn naturiol ac asesu sut roedd modurwyr yn rhyngweithio â cheffylau ar y ffordd.

Gwnaeth swyddogion fonitro cerbydau wrth iddynt fynd heibio a stopio gyrwyr pan fu angen i rannu cyngor ac addysg ar yrru'n ddiogel o amgylch ceffylau. Y prynhawn hwnnw, stopiwyd 27 o gerbydau, siaradwyd â saith gyrrwr am eu ffordd o yrru a chafodd un ohonynt adroddiad trosedd draffig.

Mae'r ymgyrch yn canolbwyntio ar addysgu gyrwyr a marchogion, lleihau'r risg o wrthdrawiadau a helpu i gadw pawb sy'n defnyddio'r ffyrdd yn ddiogel. Anogir beicwyr i chwarae eu rhan nhw hefyd drwy wisgo dillad llachar pan fo hynny'n briodol a dilyn arferion da o ran diogelwch ar y ffyrdd.

Yr wythnos diwethaf, aeth swyddogion i Sioe Frenhinol Cymru hefyd, lle gwnaethant ymuno â phartneriaid i ddangos pwysigrwydd pasio ceffylau yn ddiogel. Roedd y digwyddiad yn gyfle i siarad â'r cyhoedd ac atgyfnerthu'r negeseuon allweddol ynghylch rhannu'r ffordd mewn modd cyfrifol.

Mae marchogion ceffylau ymhlith y defnyddwyr ffyrdd mwyaf agored i niwed, a gall ceffylau gael eu dychryn yn hawdd gan gerbydau sy'n pasio'n rhy gyflym neu'n rhy agos. Drwy arafu a rhoi digon o le i geffylau, gall gyrwyr helpu i leihau'r risg o wrthdrawiad neu anaf difrifol.

Dywedodd y Rhingyll Terresa Sullivan:

"Mae Ymgyrch Arabis yn ymwneud â helpu gyrwyr i ddeall sut i basio ceffylau yn ddiogel. Drwy arafu, gadael digon o le a dangos amynedd, gall modurwyr helpu i gadw ceffylau, marchogion a phawb arall sy'n defnyddio ein ffyrdd yn ddiogel.
"Diolch i'r ymgyrch diweddar ym Meisgyn, roedd modd i ni arsylwi ar ymddygiad gyrwyr ac ymgysylltu â modurwyr am y ffordd maen nhw'n pasio ceffylau ar y ffyrdd. Mae'r data a gafwyd drwy ap "Horse i" Cymdeithas Ceffylau Prydain yn amhrisiadwy i'n helpu i nodi ffyrdd lle mae marchogion yn cael problemau. Byddwn yn parhau i dargedu gweithgarwch gorfodi ac addysg mewn ardaloedd lle mae niferoedd uchel o ddigwyddiadau yn cael eu hadrodd, gan sicrhau bod gyrwyr yn deall eu cyfrifoldebau ac yn helpu i wneud ein ffyrdd yn fwy diogel i bawb."

Rydym yn atgoffa gyrwyr i ddilyn y Cod Priffyrdd wrth basio ceffylau:

• Arafwch i uchafswm o 10mya.
• Gadewch o leiaf ddau fetr rhyngoch chi a'r ceffyl.
• Pasiwch yn ddigon pell ac yn araf.
• Peidiwch â refio eich injan na seinio'ch corn.

Am ragor o wybodaeth am basio ceffylau yn ddiogel, ewch i: https://www.bhs.org.uk/go-riding-and-learn/riding-out-hacking/riding-on-roads/advice-for-motorists/