Tri dyn ifanc wedi'u dedfrydu ar ôl cyflawni lladrad ym Mhort Talbot

Mae dau ddyn wedi cael eu hanfon i sefydliad troseddwyr ifanc ac mae bachgen wedi cael gorchymyn atgyfeirio ieuenctid am eu rhan mewn ymosodiad treisgar ac achos o ladrata ym Mhort Talbot.

Gwnaeth y dioddefwr dreulio sbel yn yr ysbyty yn dilyn y digwyddiad ar 26 Tachwedd y llynedd, a bu'n rhaid defnyddio glud i drin anaf i gefn ei ben.

Plediodd Junior Evans, 19 oed o Bort Talbot, yn euog i ladrad ac ymosod gan achosi gwir niwed corfforol ar ôl ymosod ar y dioddefwr a dwyn ei gerdyn banc. Cafodd ei ddedfrydu i sefydliad troseddwyr ifanc am ddwy flynedd a chwe mis ac mae wedi cael ei wneud yn destun gorchymyn atal yn erbyn y dioddefwr am bum mlynedd. Mae'n rhaid iddo dalu gordal dioddefwr o £228 hefyd.

Plediodd Kurtis James, 19 oed, heb gartref sefydlog, yn euog i ladrad a dal plentyn mewn gofal rhag yr unigolyn sy’n gyfrifol amdano heb awdurdod cyfreithlon. Cafodd ei ddedfrydu i sefydliad troseddwyr ifanc am dair blynedd a dau fis ac mae wedi cael gorchymyn atal yn erbyn y dioddefwr am gyfnod o bum mlynedd.

Plediodd bachgen 17 oed o Gwmbrân yn euog i ymosod gan achosi gwir niwed corfforol a chyfaddefodd hefyd ei fod wedi torri dau o amodau ei fechnïaeth. Mae wedi cael gorchymyn atgyfeirio ieuenctid am gyfnod o ddeuddeg mis a gorchymyn atal yn erbyn y dioddefwr am flwyddyn.

Dywedodd y Ditectif Gwnstabl Ria Price: 

"Dyma achos annerbyniol o drais anarchaidd gan dri dyn ifanc llwfr yn erbyn unigolyn diamddiffyn. 

"Does dim lle mewn cymdeithas i bobl fygythiol sy'n ymddwyn fel hyn.

"Roedd fy stumog yn troi wrth wylio deunydd fideo o'r digwyddiad yn ystod yr ymchwiliad. Mae'n hynod ffodus na chafodd y dioddefwr anafiadau mwy difrifol byth."