Diweddariad am ddigwyddiad yng Ngorseinon: Lansio ymchwiliad i lofruddiaeth

Cafodd swyddogion eu galw i Heol Pen Cae Crwn, Gorseinon, Abertawe am 12:58pm heddiw (dydd Iau 9 Gorffennaf) yn dilyn adroddiad am wrthdrawiad rhwng car a beic oddi ar y ffordd.  

Aeth parafeddygon i'r lleoliad a chyhoeddwyd bod dyn wedi marw yn y fan a'r lle. Nid yw'r dyn wedi’i adnabod yn ffurfiol eto, ond mae teulu dyn 18 oed o Abertawe wedi cael gwybod. Mae dyn arall, 19 oed, wedi cael ei gludo i'r ysbyty gydag anafiadau.  

Mae dyn 18 oed o Dreforys wedi cael ei arestio ar amheuaeth o lofruddiaeth, gyrru cerbyd modur yn beryglus, gyrru cerbyd modur tra roedd mewn cyflwr anaddas oherwydd cyffuriau a gyrru cerbyd modur gyda chyffur a reolir penodol uwchlaw'r trothwy penodedig. Mae'n parhau i fod yn nalfa'r heddlu.  

Dywedodd y Ditectif Brif Arolygydd Danielle Thorne o'r Tîm Ymchwilio i Droseddau Mawr: "Rwy'n deall y pryder ymysg aelodau o'r gymuned leol o ganlyniad i'r ymchwiliad hwn, a hoffwn ddiolch iddynt am eu hamynedd a'u dealltwriaeth barhaus ar yr adeg hon. Mae presenoldeb heddlu sylweddol yn yr ardal ar hyn o bryd, a bydd hynny'n parhau am nifer o oriau, ond rydym yn gweithio'n gyflym i gynnal ymholiadau yn rhan o’r ymchwiliad cymhleth hwn.  

"Mae Heol Pen Cae Crwn ar gau ar hyn o bryd rhwng Heol Cecil ar gyffordd y Stryd Fawr a Heol Pen Cae Crwn Road tuag at y gyffordd ar Heol Frampton. Mae Heol Brighton, Heol Brynteg a Heol Pontarddulais ar gau hefyd. "Rydym yn gweithio'n ddiflino i agor yr holl ffyrdd sydd wedi cael eu cau cyn gynted â phosibl. Gofynnaf i drigolion sydd angen gadael neu fynd i mewn i’r ardal ar frys siarad ag un o’r swyddogion yn y lleoliad a fydd yn eich helpu yn ôl yr angen.  

"Yn olaf, rwy'n apelio ar unrhyw un a welodd y digwyddiad ac sydd heb siarad â swyddogion eto, neu unrhyw un sydd â lluniau camera cerbyd neu deledu cylch cyfyng/cloch drws, i gysylltu drwy ddefnyddio'r ddolen hon. Rydym yn awyddus iawn i glywed gan unrhyw un sydd â lluniau o'r ffyrdd canlynol rhwng 8am a 2:30pm heddiw (9 Gorffennaf): 

• Heol Pen Cae Crwn 

• Heol Pontarddulais 

• Heol Brynteg 

• Heol Cecil 

• Heol Y Mynydd 

• Y trac rhwng Heol Cecil a Heol y Mynydd 

• Heol Brighton." 

Fel arall, gallwch ffonio 101 gan ddyfynnu'r cyfeirnod 2600218457 neu gysylltu â Crimestoppers yn ddienw drwy'r ddolen hon.