Carcharu dyn o Gwmafan ar ôl iddo bledio'n euog i ddosbarthu delweddau anweddus

Mae dyn o Gastell-nedd Port Talbot wedi cael ei garcharu ar ôl pledio'n euog i feddu ar ddelweddau anweddus o blant ac anifeiliaid a'u dosbarthu.

Adnabuwyd Chris Williams, 40 oed o Gwmafan, pan wnaeth cyfrif Kik a oedd yn gysylltiedig â'i gyfeiriad e-bost lanlwytho dwy ddelwedd Categori A o blant i'r rhyngrwyd ym mis Tachwedd 2024, un ohonynt yn cynnwys milgydiad.

Drwy ymchwilio i Williams, darganfuwyd ei fod yn meddu ar gyfanswm o 62 o ddelweddau o bornograffi eithafol a oedd yn cynnwys plant ac anifeiliaid.

Plediodd Williams yn euog i feddu ar ddelweddau pornograffig eithafol, tri chyhuddiad o greu llun anweddus o blentyn, un cyhuddiad o dynnu llun anweddus o blentyn ac un cyhuddiad o ddosbarthu llun anweddus o blentyn ym mis Mai.

Mae ef wedi cael ei ddedfrydu i 28 mis yn y carchar. 

Dywedodd y Ditectif Gwnstabl Elena Lewis:

"Roedd y delweddau erchyll yr oedd Chris Williams yn meddu arnynt ac yn eu rhannu yn echrydus, yn anfoesol ac yn hollol annerbyniol.

"Mae'n warthus ei fod wedi cael pleser rhywiol o'r delweddau hyn ac mae'n profi ei fod yn beryglus i blant.

"Mae'r achos hwn wedi cael effaith sylweddol ar y gymuned leol. Gobeithio eu bod nhw a'u teuluoedd yn dawelach eu meddyliau nawr bod Chris Williams yn y carchar."

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Mae cyfoeth o wybodaeth a manylion am wasanaethau cymorth ar gael yma.