Carcharu dyn o Abertawe ar ôl ei arestio am dreisio menyw

Mae dyn o Abertawe wedi cael ei garcharu ar ôl i reithgor ei gael yn euog o dreisio menyw, ei chamgarcharu, ymosod arni a'i thagu.

Gwnaeth Jamie Rawson, 56 oed o ganol y ddinas, ymosod ar y dioddefwr am gyfnod estynedig, wedi cwrdd â hi am y tro cyntaf y noson honno, sef 8 Chwefror 2025.

Ar ôl pledio'n ddieuog i bob cyhuddiad, cafwyd Rawson yn euog yn y pen draw o un cyhuddiad o dreisio, un o gamgarcharu, un o ymosod gan achosi gwir niwed corfforol ac un o dagu bwriadol. 

Mae wedi cael ei ddedfrydu i 17 mlynedd.

Dywedodd y Ditectif Gwnstabl Rebecca Monks:

"Hoffwn ddiolch i'r dioddefwr yn yr achos hwn am ei dewrder eithriadol drwy gydol y broses ymchwilio. Diolch iddi hi, rydym wedi llwyddo i euogfarnu dyn sydd, yn amlwg, yn fygythiad i fenywod a'r cyhoedd. Rwy'n gobeithio y bydd hyn yn ei helpu i symud ymlaen mewn ffordd fwy cadarnhaol ac yn rhoi rhywfaint o gysur iddi.

"Yn ystod y treial, ni wnaeth James Rawson ddangos dim edifeirwch am ei weithredoedd ac fe wnaeth ddiystyru lles y dioddefwr yn llwyr, er gwaethaf achosi anafiadau erchyll iddi.  

“Os ydych chi wedi dioddef trosedd rywiol, rydym yn eich annog i roi gwybod i'r heddlu cyn gynted â phosibl. Byddwch yn cael eich cefnogi a bydd swyddogion yn trin pob achos gyda sensitifrwydd a phroffesiynoldeb.”

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Mae cyfoeth o wybodaeth a manylion am wasanaethau cymorth ar gael yma.