Atafaelu a dinistrio 800 o e-feiciau a sgwteri anghyfreithlon mewn ymgyrch gan yr heddlu a chyngor

Yn dilyn ymgyrch ar y cyd yng Nghaerdydd a'r cyffiniau ddydd Gwener, mae rhagor o e-feiciau a sgwteri anghyfreithlon wedi cael eu tynnu oddi ar y ffyrdd.

O ganlyniad i'r ymgyrch ddydd Gwener 3 Gorffennaf, pan fu Heddlu De Cymru, staff Cyngor Caerdydd, a Gwasanaeth Awyr Cenedlaethol yr Heddlu (NPAS) oll yn gweithio ar y cyd, atafaelwyd a dinistriwyd 68 o gerbydau mecanyddol anghyfreithlon (MPVs).

Roedd yr atafaeliadau ddydd Gwener yn cynnwys sawl un o Daith Taf, a chafodd cyfanswm o 17 o e-feiciau anghyfreithlon eu canfod a'u hatafaelu o fannau gwyrdd a llwybrau yng Nghaerdydd. Atafaelwyd un e-feic hefyd gan feiciwr ar Stryd y Castell a oedd yn gallu cyrraedd 86km/h.

Mae cyfanswm yr MPVs anghyfreithlon a atafaelwyd ers Awst 2025 bellach wedi cyrraedd 800.

Dywedodd yr Arolygydd Tim Ursell o Heddlu De Cymru: 

"Mae'r gweithgarwch hwn, fel rhan o Ymgyrch Livewire, yn dilyn adroddiadau gan ein cymunedau lleol sydd wedi lleisio pryderon ynghylch ymddygiad gwrthgymdeithasol ar MPVs a materion cysylltiedig.

"Rydym yn parhau i gynnal y gweithrediadau hyn, sy'n gofyn am lawer o adnoddau, i fynd i'r afael â'r defnydd o e-feiciau a sgwteri anghyfreithlon yn ein cymunedau.

"Roedd yr ymgyrch hon yn cynnwys timau mewn dillad plaen ac iwnifform yn patrolio mewn mannau problemus, gan gynnwys Taith Taf, Gabalfa, Cathays, canol dinas Caerdydd, Treganna, a Grangetown."

Dywedodd y Cynghorydd Ed Stubbs, Aelod o'r Cabinet dros Wasanaethau Rheng Flaen yng Nghyngor Caerdydd: "Mae beiciau trydanol ac e-sgwteri anghyfreithlon yn achosi problemau sylweddol mewn cymunedau lleol ar draws Caerdydd, gan gynnwys yng nghanol y ddinas a pharciau ledled y ddinas. Mae'r cyhoedd wedi ei gwneud yn glir i ni nad ydyn nhw'n teimlo'n ddiogel pan fo e-feiciau anghyfreithlon yn cael eu reidio ar gyflymder gormodol yn eu cymunedau, felly rydym wedi gweithredu a byddwn yn parhau i wneud hynny.

"Yn aml nid oes trwydded gan feicwyr y beiciau hyn ac nid ydynt wedi'u hyswirio i'w defnyddio, gan greu perygl i ddefnyddwyr eraill y ffordd. Drwy weithio gyda Heddlu De Cymru, gallwn dargedu ardaloedd o'r ddinas lle maen nhw'n cael eu defnyddio'n anghyfreithlon ac atafaelu'r beiciau fel na ellir eu defnyddio ar gyfer ymddygiad gwrthgymdeithasol mwyach.

"Ers i ni ddechrau'r gweithrediadau hyn ym mis Awst 2025, rydym wedi tynnu 800 o e-feiciau, e-sgwteri a beiciau oddi ar y ffordd sydd wedi'u haddasu'n anghyfreithlon o'r strydoedd a'r mannau gwyrdd yng Nghaerdydd."

Yn ogystal â'r atafaeliadau, arestiwyd rhai beicwyr, gan gynnwys y rhain:

• Dyn yn ei 20au o Gaerdydd wedi'i stopio ar Sur-Ron ym Mharc Lydstep, Gabalfa. Ar ôl stopio a chwilio, darganfuwyd ei fod yn meddu ar ddau ffôn symudol a 33 o becynnau o grac cocên a heroin gwerth tua £1000. Ymddangosodd yn y llys ddydd Sadwrn ac mae ef wedi cael ei ddyfarnu'n euog o ddau gyhuddiad o feddu ar gyffuriau Dosbarth A gyda'r bwriad o gyflenwi, ac un cyfrif o feddu ar gyffur rheoledig Dosbarth B. Bydd yn cael ei ddedfrydu y mis nesaf.
• Dyn 18 oed, wedi'i ganfod yn Nhrelái gan NPAS yn ymddangos fel petai'n reidio e-feic anghyfreithlon. Gwnaeth swyddogion ar lawr gwlad arestio'r dyn, atafaelwyd yr e-feic a chadarnhawyd ei fod yn anghyfreithlon. Ar ôl ymchwilio ymhellach, cafodd y dyn 18 oed ei arestio ar amheuaeth o feddu ar gyffuriau Dosbarth B gyda'r bwriad o gyflenwi, a gyrru cerbyd modur heb drwydded yrru nac yswiriant. Mae ef wedi cael ei ryddhau ar fechnïaeth hyd nes y bydd ymholiadau pellach.
• Bachgen 16 oed wedi'i ganfod gan NPAS yn Nhrelái yn reidio beic modur trydanol dan amheuaeth dosbarthu cyffuriau. Ymyrrodd swyddogion cymdogaeth lleol a chafodd y bachgen 16 oed, ynghyd â bachgen 16 oed arall, eu harestio ar amheuaeth o fod yn ymwneud â chyflenwi cyffuriau dosbarth B. Cafodd un o'r bobl ifanc ei arestio ymhellach ar dri chyhuddiad o ymosod ar weithwyr brys. Atafaelwyd tua 35g o ganabis hefyd.
• Cafodd dyn 21 oed o'r Sblot ei stopio yn Cathays ar ôl i swyddog ei weld yn cwrdd â dyn ar Sur-Ron, cyn iddyn nhw fynd i mewn i lôn. Cafodd y dyn ei stopio a'i chwilio, cyn cael ei arestio ar amheuaeth o feddu ar gyffuriau dosbarth B.