Heddluoedd Cymru yn targedu ymddygiad sarhaus a bygythiol cyn etholiadau'r Senedd

Bydd pob ymgeisydd yn etholiadau'r Senedd sydd ar fin cael eu cynnal yn cael canllawiau er mwyn eu helpu i ymateb os byddant yn wynebu ymddygiad bygythiol neu sarhaus yn ystod ymgyrch yr etholiadau.

Mae'r ddogfen ganllaw Pan fydd pethau'n mynd yn rhy bell: Canllawiau ar y cyd i ymgeiswyr mewn etholiadau yn rhoi cyngor ar y gweithredoedd neu'r ymddygiadau a allai fod yn drosedd, pryd y dylid cysylltu â'r heddlu a chamau ymarferol y gall ymgeiswyr eu cymryd i ddiogelu eu hunain.

Datblygwyd y canllawiau ar y cyd gan Gyngor Cenedlaethol Prif Swyddogion yr Heddlu, y Comisiwn Etholiadol, y Coleg Plismona, a Gwasanaeth Erlyn y Goron.

Mae heddluoedd Cymru hefyd yn paratoi i gynnig ymateb wedi'i deilwra i ymgeiswyr gan gynnwys rhoi sesiynau briffio diogelwch a neilltuo uwch-bwyntiau cyswllt unigol er diogelwch ymgeiswyr.

Mae Heddlu De Cymru, Heddlu Gwent, Heddlu Dyfed-Powys a Heddlu Gogledd Cymru wedi ymrwymo i atal a chanfod troseddau a galluogi'r broses ddemocrataidd i fynd rhagddi heb gael ei hatal, sy'n rôl a gymerir o ddifrif yn y maes plismona.

Dywedodd y Ditectif Arolygydd Dros Dro, Andrew Westlake, sef cydlynydd etholiadau Cymru gyfan ar gyfer plismona:

“Mae sarhau neu fygwth ymgeiswyr mewn etholiadau yn arwain at oblygiadau difrifol i unigolion a'n democratiaeth. Bydd canllawiau ymarferol yn helpu ymgeiswyr i gadw'n ddiogel wrth ymgyrchu. Bydd pob heddlu yng Nghymru yn cynnig sesiynau briffio diogelwch ar gyfer ymgeiswyr yn ystod y cyfnod cyn etholiadau'r Senedd.
“Mae ymgyrchu a safbwyntiau gwleidyddol croes yn dangos democratiaeth iach, ond ni ddylai'r rhain groesi'r llinell i achos o gam-drin troseddol, aflonyddu neu anhrefn. Mae cosbau difrifol i'r sawl sy'n cael eu canfod yn euog o droseddau.”

Mae 'Responding to intimidating behaviour in elections and public office': Canllaw gan Wasanaeth Erlyn y Goron yn rhoi gwybodaeth i ymgeiswyr am droseddau posibl fel difrod troseddol, ymddygiad sarhaus neu fygythiol, aflonyddu, stelcio, troseddau casineb a throseddau sy'n ymwneud ag etholiadau fel datganiadau anwir yn erbyn cymeriad ymgeisydd.

Gofynnir i ymgeiswyr wneud y canlynol:

• Ymgysylltu â'u pwyntiau cyswllt unigol yn eu heddlu lleol er diogelwch ymgeiswyr;
• Cymryd camau gweithredol o ran diogelwch personol er mwyn cadw eu hunain a'u staff ymgyrchu yn ddiogel;
• Peidio â chanfasio ar eu pen eu hunain a sicrhau bod rhywun yn gwybod ble maent yn canfasio;
• Cadw cofnodion o unrhyw ymddygiad bygythiol neu sarhaus;
• Cynnal archwiliad iechyd ar-lein i sicrhau nad yw gwybodaeth bersonol sensitif ar gael yn eang;
• Rhoi gwybod i ddarparwyr gwasanaethau rhyngrwyd a llwyfannau cyfryngau cymdeithasol am ymddygiad bygythiol neu sarhaus.

Mae ymgeiswyr hefyd yn cael eu rhybuddio ynghylch arwyddion y gallai ymddygiad fod yn gwaethygu – bygythiadau o drais uniongyrchol, syniadau obsesiynol neu ryddhau gwybodaeth bersonol nad yw wedi'i chyhoeddi eisoes – ac i ffonio 999 ar unwaith mewn argyfwng.