Dau ddyn wedi'u carcharu am gyflenwi canabis

Mae dau ddyn wedi cael eu carcharu ar ôl cael eu stopio gan swyddogion yng Ngharchar y Parc EF ym Mhen-y-bont ar Ogwr.

Cafodd Frasal Ali, 35 oed o Birmingham, ei ddedfrydu i ddwy flynedd a thri mis yn y carchar ar ôl cael ei euogfarnu.

Cafodd Mubasher Zaman, 36 oed o Rotherham, ei ddedfrydu i dair blynedd a phedwar mis yn y carchar ar ôl cael ei euogfarnu.

Cawsant eu dedfrydu ddydd Gwener 10 Ebrill yn Llys y Goron Sheffield, lle plediodd Ali yn euog i ymwneud â chyflenwi canabis, caffael/defnyddio eiddo troseddol ac ymosod ar weithiwr y gwasanaethau brys. Plediodd Zaman yn euog i ymwneud â chyflenwi canabis ac ymwneud ag osgoi gwaharddiad ar fewnforio cyffur dosbarth B yn dwyllodrus.

Pan oedd Ali ar ymweliad â Charchar y Parc, fe wnaeth swyddogion o'r tîm troseddau cyfundrefnol ei stopio wrth iddo adael. Wrth i swyddogion chwilio'r car, ciciodd Ali un ohonynt. Daeth swyddogion o hyd i ganabis a dros £3,000 mewn arian parod yn y car. Roedd Zaman yn eistedd yn sedd teithiwr y car.

Atafaelwyd ffonau Zaman ac Ali ac, wrth i’r heddlu lawrlwytho data'r ffonau symudol, darganfuwyd sawl neges oedd yn cysylltu'r ddau ddyn ag ymgyrch gyffuriau ar raddfa fawr ledled y DU.

Dywedodd Cwnstabl yr Heddlu Jonathan Jones, “Mae'r achos hwn yn dangos ein hymrwymiad i fynd i'r afael â throseddau sy'n ymwneud â chyffuriau a sicrhau bod y rheini sydd am elwa o'r gweithgareddau anghyfreithlon hyn yn wynebu goblygiadau eu gweithredoedd. Byddwn yn parhau i weithio'n ddiflino i wneud ein cymunedau'n fwy diogel.”