Carcharu menyw o Bort Talbot yn dilyn achos o daro a ffoi bwriadol

Mae menyw o Gastell-nedd Port Talbot wedi cael ei charcharu ar ôl iddi daro dyn â’i char yn fwriadol a gwrthod stopio.

Cafodd Louise Blackwell, 59 oed o Bort Talbot, ei gweld yn gollwng y dioddefwr ar Heol Margam yn ystod oriau mân 23 Hydref 2025 cyn gyrru i ffwrdd, troi o gwmpas a gyrru i mewn i'r dioddefwr ar gyflymder wrth iddo groesi'r ffordd. Ni ddangosodd Blackwell unrhyw arwyddion o arafu wrth iddi ffoi o'r lleoliad yn ei cherbyd.

Canfu ymchwiliad gan Heddlu De Cymru fod Blackwell yn gyrru dan ddylanwad alcohol adeg y digwyddiad. Daethpwyd o hyd i Blackwell ac fe gafodd ei harestio ddyddiau'n ddiweddarach.

Plediodd Blackwell yn euog i achosi niwed corfforol difrifol heb fwriad ym mis Rhagfyr.

Plediodd Blackwell yn ddieuog i ymgais i lofruddio ac Adran 18 clwyfo'n fwriadol, ond fe'i cafwyd yn euog o'r ail drosedd ar 16 Ebrill.

Heddiw, mae wedi cael ei dedfrydu i deg mlynedd yn y carchar.

Dywedodd y Ditectif Gwnstabl Tom Herbert:

“Mae Louise Blackwell yn fenyw hynod beryglus sy'n llawn haeddu cyfnod yn y carchar.

“Cafodd y dioddefwr ei anafu'n ddifrifol a bydd yn cymryd cyfnod sylweddol iddo wella'n llwyr ar ôl i Louise Blackwell ei daro ar gymaint o gyflymder.

“Mewn ymgais i gelu'r hyn roedd wedi'i wneud, dywedodd Blackwell wrth ei merch ei bod wedi taro anifail. Gofynnodd iddi ei helpu i gael gwared ar unrhyw dystiolaeth ar y cerbyd, cyn cyfaddef y cwbl yn y pen draw.

“Cyfuniad o alcohol a dicter achosodd i Louise Blackwell gyflawni ei gweithredoedd erchyll y diwrnod hwnnw ym mis Hydref. Bydd hi'n awr yn talu am ei throseddau o'r diwedd."