Carcharu dau o Rydaman am ddelio cyffuriau Dosbarth A yn Abertawe

Mae dau ddyn o Sir Gaerfyrddin wedi cael eu carcharu ar ôl iddynt gael eu dal yn cyflenwi cyffuriau Dosbarth A.

Cafodd Jac Cadman, 23 oed, a Jamie Cook, 31 oed, y ddau ohonynt o Rydaman, eu hadnabod ddydd Gwener 13 Mawrth pan dynnwyd sylw dau swyddog oedd ar batrôl ym Mlaenymaes, Abertawe, at gerbyd oedd wedi’i gofrestru a’i yswirio dan enw deiliad trwydded dros dro.

Cynhaliodd y swyddogion chwiliad o dan y Ddeddf Camddefnyddio Cyffuriau ar ôl sylwi ar ymddygiad amheus Cadman a Cook tra oeddent yn y cerbyd. Daethpwyd o hyd i fag snap yn cynnwys powdr gwyn ym mhoced Cadman, ynghyd â £470 mewn arian parod a chardiau banc oedd yn perthyn i bobl eraill. Darganfuwyd bod gan Cook £880 mewn arian parod a phedwar bag snap arall â phowdr gwyn ynddynt yn ei feddiant. Cadarnhawyd yn ddiweddarach mai cocên oedd y powdr gwyn.

Cafodd tri ffôn symudol oedd yn cynnwys negeseuon yn cysylltu’r ddau ddyn â gwerthu cyffuriau Dosbarth A eu hadfer hefyd.

Plediodd Jac Cadman yn euog i fod â chocên yn ei feddiant gyda'r bwriad o'i gyflenwi, ymwneud â chyflenwi cocên a bod ag eiddo troseddol yn ei feddiant. Plediodd Jamie Cook yn euog i fod â chocên yn ei feddiant gyda'r bwriad o'i gyflenwi a bod ag eiddo troseddol yn ei feddiant.

Mae Jac Cadman wedi cael ei ddedfrydu i 28 mis yn y carchar. Mae Jamie Cook wedi cael ei ddedfrydu i 40 mis yn y carchar.

Dywedodd y Rhingyll Luke Tucker:

“Byddai Jac Cadman and Jamie Cook wedi teimlo'n wych wrth feddwl am sut roeddent yn mynd i wneud llawer o arian yn gyflym drwy ddelio cyffuriau Dosbarth A. Yn anffodus iddyn nhw, wnaeth y teimlad hwnnw ddim para’n hir ar ôl iddynt gael eu dal gan swyddogion.

“Fel pob deliwr cyffuriau arall sydd wedi peri trallod ar strydoedd Abertawe, mae'r ddau ohonynt yn llawn haeddu treulio cyfnod dan glo.”