Canlyniadau cadarnhaol wrth i'r heddlu leihau troseddau yn ardal Dyfaty yn Abertawe

Mae Heddlu De Cymru wedi adrodd am ganlyniadau cadarn cynnar yn ystod dau fis cyntaf eu gwaith rhagweithiol yn ardal Dyfaty, Abertawe, yn rhan o'r fenter Clirio, Dal, Adeiladu.

Rhwng 15 Ionawr a 15 Mawrth, bu swyddogion yn canolbwyntio ar gamau gorfodi wedi'u targedu yn erbyn y rhai sy'n achosi niwed yn y gymuned.

Mae'r prif ganlyniadau hyd yma yn cynnwys:

• Arestio 28 o unigolion am droseddau, gan gynnwys ymosodiadau, lladrata, delio mewn cyffuriau a meddu ar gyffuriau, gwarantau ‘peidio ag ymddangos’, a throseddau sy'n ymwneud ag arfau.

• Stopio a chwilio 45 o unigolion, gyda 15 canlyniad positif yn arwain at arestiadau a datrysiadau y tu allan i'r llys lle bo hynny'n briodol.

• Rhoi cyfarwyddyd i 38 o bobl adael yr ardal mewn ymateb i ymddygiad gwrthgymdeithasol.

• Cyflwyno 4 rhybudd gwarchod y gymuned i droseddwyr mynych nad oedd ganddynt reswm cyfreithlon i fod yn yr ardal.

• Gweithredu 5 gwarant camddefnyddio cyffuriau mewn cyfeiriadau penodol.

Mae'r ymdrechion hyn wedi cyfrannu at ostyngiad o 12% mewn lefelau troseddu yn gyffredinol yn ardal Dyfaty a gostyngiad o 69% mewn achosion o ymddygiad gwrthgymdeithasol y rhoddwyd gwybod amdanynt o gymharu â'r un cyfnod y llynedd.

Dywedodd yr Arolygydd Andrew Hedley:

“Mae'r canlyniadau cynnar hyn yn adlewyrchu'r dull partneriaeth cryf rydyn ni wedi'i sefydlu gyda'n cydweithwyr mewn awdurdodau lleol, gwasanaethau cymorth a'r gymuned ei hun. Mae ein presenoldeb parhaus yn Dyfaty yn gwneud gwahaniaeth gwirioneddol, ac rydym yn ymrwymedig i adeiladu ar y cynnydd hwn i sicrhau bod trigolion yn teimlo'n ddiogel a’u bod yn cael eu cefnogi. Megis dechrau yw hyn, a byddwn yn parhau i weithio gyda'n gilydd i gyflawni gwelliannau hirdymor ar gyfer yr ardal."

Prif brosiect Bwrdd Gwasanaethau Cyhoeddus Abertawe yw prosiect Clirio, Dal, Adeiladu, sy'n gweithio o dan y teitl Adeiladu Dyfaty Gwell. Ei nod yw adeiladu ar fentrau llwyddiannus a gyflwynwyd mewn mannau eraill yn ardal Heddlu De Cymru, gan gynnwys Merthyr Tudful, Adamsdown, y Rhath a Butetown.

Mae'r cam Clirio yn cael ei arwain gan Heddlu De Cymru ac yn canolbwyntio ar weithgarwch gorfodi, tarfu a diogelu gweladwy i gael gwared ar ddylanwad troseddau cyfundrefnol difrifol yn Nyfaty a'r cyffiniau. Disgwylir i'r cam hwn bara tua 12 mis.

Bydd y cam Dal yn cael ei arwain gan Gyngor Abertawe, gan weithio gyda holl bartneriaid y Bwrdd Gwasanaethau Cyhoeddus, gan ganolbwyntio ar gynnal diogelwch, atal troseddwyr rhag dychwelyd ac atgyfnerthu hyder cymunedau drwy bresenoldeb partneriaeth barhaus.

Bydd y cam Adeiladu yn dechrau yn ystod y cam Dal ac yn parhau dros y tymor hwy.

Bydd yn canolbwyntio ar fuddsoddi yn Nyfaty i fynd i'r afael â gwendidau sylfaenol, cefnogi twf economaidd a helpu i greu cymunedau gwydn.