Lleidr wedi'i garcharu a'i wahardd o feysydd parcio ar ôl cael ei ddal gydag eiddo wedi'i ddwyn
Cynnwys y prif erthygl
Mae Tyler Roberts wedi'i wahardd o feysydd parcio NCP yng nghanol dinas Caerdydd ar ôl dwyn o geir wedi'u parcio.
Torrwyd i mewn i dri char ym meysydd parcio NCP ar Stryd y Cei a Heol y Brodyr Llwydion dros benwythnos 14 a 15 Chwefror.
Gwelodd aelod gwyliadwrus o'r cyhoedd Roberts yn ymddwyn yn amheus yn y maes parcio ar Stryd y Cei a thynnodd lun ohono.
Cafodd y lluniau eu dangos i'r heddlu a oedd ar batrôl yng nghanol y ddinas, ac roedd y swyddogion wedi adnabod Roberts wrth iddo gerdded heibio Castell Caerdydd yn ystod oriau mân bore dydd Sul 15 Chwefror.
Roedd yn cario bag dyffl du a bag gwrth-ddŵr ar ei gefn.
Yn y bagiau, roedd nwyddau yr amheuwyd eu bod wedi'u dwyn gan gynnwys gliniadur, iPhone, sbectol haul ddrud, arian parod a gemwaith.
Ymddangosodd Roberts gerbron Llys Ynadon Caerdydd ddydd Llun 16 Chwefror lle plediodd yn euog i dri achos o ddwyn.
Cafodd ei garcharu am 14 wythnos ac mae wedi'i wneud yn destun Gorchymyn Ymddygiad Troseddol sy'n ei wahardd rhag mynd i mewn i unrhyw faes parcio NCP yng Nghanol Dinas Caerdydd am ddwy flynedd.
Dywedodd yr Arolygydd Joe Smith o Heddlu De Cymru: “Rydym yn gwybod bod dioddef trosedd car yn peri loes, yn gostus ac yn achosi anghyfleustra.
“Yn ffodus ar yr achlysur hwn, gwnaethom lwyddo i arestio'r unigolyn cyfrifol yn gyflym a dychwelyd yr eiddo i'r dioddefwyr.
“Mae lladron yn targedu meysydd parcio yng nghanol dinas Caerdydd. Peidiwch â gadael pethau gwerthfawr, gan gynnwys bagiau siopa, yn y golwg.”
Am ragor o wybodaeth am sut i gadw eich cerbyd yn ddiogel, ewch i'n gwefan.
https://www.south-wales.police.uk/cy-GB/cp/cyngor-atal-troseddau/dwyn-cerbyd/car-diogelwch-difrod/