Dyn o Gaerdydd wedi'i garcharu ar ôl ceisio osgoi cael ei arestio drwy neidio i afon.

Mae Ryan Rankmore, 42, o Lanrhymni wedi cael ei ddedfrydu i 12 wythnos yn y carchar ar ôl iddo bledio'n euog i ladrata o siop a thri achos o ymosod drwy daro. 

Ar 8 Chwefror 2026, aeth Rankmore i mewn i wasanaethau Welcome Break ym Mhorth Caerdydd a dechrau llenwi bag ag eitemau, gan gynnwys prydau parod, alcohol a Lego. 

Cafodd Rankmore ei herio gan ddau aelod o staff a ddywedodd wrtho am fynd i dalu am yr eitemau. Ymatebodd gan ddefnyddio iaith ymosodol ac ymddwyn yn ymosodol. 

Ar ôl gadael y siop gwnaeth Rankmore daro un aelod o staff yn ei wyneb â chan o Red Bull. Cafodd swyddogion eu galw i'r siop a chwiliwyd yr ardal. Cafodd Rankmore ei weld gerllaw gan y tîm Plismona yn y Gymdogaeth lleol, ond rhedodd i ffwrdd pan geisiodd swyddogion ei atal. 

Yna neidiodd Rankmore i'r dŵr i osgoi cael ei arestio, cyn bygwth mynd ymhellach i'r afon. 

Roedd adnoddau o Heddlu De Cymru, Gwasanaeth Tân ac Achub De Cymru, Ambiwlans Cymru a Gwasanaeth Awyr Cenedlaethol yr Heddlu yn bresennol, a llwyddwyd i dynnu Rankmore o'r afon i fyny i'r lan lle cafodd ei arestio ar amheuaeth o ladrata o siop ac ymosod drwy daro. 

Ar ôl ei arestio, datgelwyd bod Rankmore ar fechnïaeth amodol yn aros am achos llys ar ôl cael ei gyhuddo o ddau achos o ymosod drwy daro, yn dilyn digwyddiad ym mis Mehefin 2025. Newidiodd ei ble i euog ar 10 Chwefror.

Dywedodd PC Jones: 

“Roedd gweithredoedd Rankmore ar 8 Chwefror yn anfaddeuol. Ni ddylai neb ddioddef trais nag ymddygiad bygythiol dim ond am wneud eu gwaith. Gwnaeth ei ymdrechion i osgoi cael ei arestio nid yn unig wastraffu adnoddau brys, ond roeddent hefyd yn ddibwrpas, gan ein bod yn benderfynol o'i ddwyn i gyfrif am ei weithredoedd. 

“Mae cyhuddiadau ychwanegol Rankmore am ymosod yn amlygu ei ymddygiad ymosodol, ac rwy’n falch o’i weld yn cael ei ddwyn i gyfrif am ei holl weithredoedd.”