Carchar i ddeliwr cyffuriau a gafodd ei ddal yn reidio Surron yn ardal Gabalfa

Cafodd deliwr cyffuriau o Gaerdydd a gafodd ei ddal â chyllell sombi a chrac cocên yn ei feddiant oedd â gwerth hyd at £5k ei garcharu heddiw.

Gwelodd swyddogion Levi James – deliwr cyffuriau adnabyddus – a oedd yn gwisgo balaclafa, yn reidio ei feic Surron drwy ardal Gabalfa ddydd Mawrth, 5 Awst 2025.

Cafodd y deliwr cyffuriau adnabyddus ei ddal ym Mharc Lydstep gan swyddogion a oedd yn cymryd rhan yn Ymgyrch Auklet – sef cyfres o warantau a phatrolau mewn ymateb i bryderon am ddelio cyffuriau.

Llwyddodd deunydd fideo camera a wisgir ar y corff i ddal yr eiliad yr ymatebodd swyddog â gwn Taser i alwad am gymorth.

Mae'r swyddog yn rhedeg yn gyflym ar hyd llwybr troed rhwng rhes o goed wrth y cae pêl-droed cyfagos gan ddod o hyd i'w gydweithiwr yn straffaglu â Levi James ar y llawr.

Ceisiodd James ymwrthod â chael ei arestio ond stopiodd ar unwaith ar ôl sylwi bod swyddog â gwn Taser wedi cyrraedd y lleoliad.

Gwnaethant chwilio'r dyn 21 oed a daethant o hyd i grac cocên oedd â gwerth hyd at £5k yn ei bocedi ac mewn bag cefn. Roedd hefyd yn cario cyllell sombi mewn gwain a swm o arian parod.

Cafodd ei gyhuddo o nifer o droseddau cyffuriau gan gynnwys bod â chrac cocên a heroin yn ei feddiant gyda'r bwriad o'u cyflenwi, bod â chyllell yn ei feddiant mewn man cyhoeddus a chaffael eiddo troseddol, sef arian parod, a phlediodd yn euog iddynt.

Ar 13 Chwefror, 2026, cafodd Levi James ei garcharu am 48 mis.

Dywedodd yr Arolygydd Tim Ursell:

“Mae delio mewn cyffuriau wedi bod yn bryder i drigolion ardal Gabalfa am beth amser ac mae'n flaenoriaeth i ni. Mae Levi James yn ddeliwr cyffuriau adnabyddus sydd wedi gwneud difrod yn y gymuned.
"Rwy'n falch o ddweud y cafodd ei garcharu heddiw am gyfnod sylweddol o amser, diolch i'r wybodaeth a'r cymorth rydym wedi'u cael gan y gymuned. Ni fydd ein ffocws yn newid a byddwn yn parhau i dargedu'r rhai sy'n peri gofid a thrais drwy droseddu.”