Ymchwiliad i blant o Gaerdydd a gafodd eu harestio yng Ngwlad Thai: diweddariad

Ym mis Mehefin, cafodd Heddlu De Cymru wybod bod dau fachgen 17 oed o Gaerdydd wedi cael eu harestio yng Ngwlad Thai.

Lansiodd Heddlu De Cymru ymchwiliad i'r amgylchiadau a arweiniodd at y plant yn teithio i Wlad Thai.

O ganlyniad i'r ymchwiliad, sy'n dal i fynd rhagddo, gallwn gadarnhau'r canlynol:

• Mae Levi Mohamed, 20 oed o Butetown, Caerdydd, wedi cael ei gyhuddo o gynllwynio i osgoi gwaharddiad ar fewnforio cyffur Dosbarth B yn dwyllodrus a phedwar cyhuddiad o gynllwynio i drefnu taith unigolyn arall gyda'r bwriad o gamfanteisio.
• Cafodd Patrick O'Driscoll, 30 oed o Gaerau, Caerdydd, ei gyhuddo o gynllwynio i osgoi gwaharddiad ar fewnforio cyffur Dosbarth B yn dwyllodrus, pedwar cyhuddiad o gynllwynio i drefnu taith unigolyn arall gyda'r bwriad o gam-fanteisio, a bod ag arf tanio yn ei feddiant. 
• Cafodd Gareth Press, 42 oed o Drelái, Caerdydd, ei gyhuddo o gynllwynio i osgoi gwaharddiad ar fewnforio cyffur Dosbarth B yn dwyllodrus a dau gyhuddiad o gynllwynio i drefnu taith unigolyn arall gyda'r bwriad o gamfanteisio.
• Mae Ffion Bowes-Cavanagh Hooley, 24 oed o Gaerau, Caerdydd, wedi cael ei chyhuddo o gynllwynio i osgoi gwaharddiad ar fewnforio cyffur Dosbarth B yn dwyllodrus.
• Cafodd dyn 23 oed o Keighley, Gorllewin Swydd Efrog, ei arestio ar amheuaeth o fewnforio cyffuriau rheoledig yn amhriodol tra roedd ar fechnïaeth yr heddlu.

Aeth swyddogion i arestio'r unigolion hyn yng Nghaerdydd a Gorllewin Swydd Efrog ddydd Mercher 5 Awst.

Mae disgwyl i'r rheini a gafodd eu cyhuddo ymddangos gerbron Llys Ynadon Caerdydd yfory (Dydd Gwener 7 Awst).

Mae'r plant yn parhau i fod yn y ddalfa yng Ngwlad Thai, lle maen nhw'n cael cymorth gan eu teuluoedd a'r Swyddfa Dramor a Chymanwlad.

Mae'r teuluoedd wedi cael gwybod bod y plant wedi cael eu harestio a'u cyhuddo.

Rydym yn deall bod hwn yn parhau i fod yn amser pryderus iawn iddyn nhw a'r gymuned ehangach.

Gofynnir i unrhyw un sydd â gwybodaeth neu sydd â phryderon gysylltu â Heddlu De Cymru gan grybwyll y cyfeirnod 2600200125.

• Cysylltwch â ni ar-lein yn https://bit.ly/SWPProvideInfo
• Ffoniwch 101 neu Crimestoppers yn ddienw ar 0800 555 111.

Ffoniwch 999 bob amser mewn argyfwng.