Carcharu dau o Ferthyr am droseddau cyffuriau
Cynnwys y prif erthygl
Cawsant eu harestio ar ôl i swyddogion eu hymlid ar hyd Ffordd Blaenau'r Cymoedd ym mis Ionawr 2026.
Cafodd Liam Ford, 24 oed o Ferthyr Tudful, ei ddedfrydu i dair blynedd yn y carchar ar ôl iddo gael ei euogfarnu. Cafodd ei wahardd rhag gyrru am dair blynedd arall hefyd.
Cafodd Daniel Barnham, 32 oed o Ferthyr Tudful, ei ddedfrydu i ddwy flynedd ac wyth mis yn y carchar yn dilyn ei euogfarn.
Cafodd y ddau ddyn eu dedfrydu yn Llys y Goron Caerdydd ddydd Mawrth 28 Gorffennaf, lle plediodd Ford yn euog i ymwneud â chyflenwi crac cocên, ymwneud â chyflenwi heroin, bod â heroin yn ei feddiant gyda'r bwriad o'i gyflenwi, bod â chrac cocên yn ei feddiant gyda'r bwriad o'i gyflenwi, gyrru cerbyd modur yn beryglus, gyrru tra roedd wedi'i wahardd, a gyrru heb yswiriant.
Plediodd Daniel Barnham yn euog i ymwneud â chyflenwi crac cocên, ymwneud â chyflenwi cocên ac ymwneud â chyflenwi heroin.
Daw hyn ar ôl i swyddogion plismona'r ffyrdd gynnal patrolau ym Merthyr Tudful ddydd Sadwrn 3 Ionawr 2026. Daeth swyddogion o hyd i Seat Ibiza yr oeddent yn gwybod ei fod yn ymwneud â chyflenwi cyffuriau yn yr ardal.
Ceisiodd swyddogion stopio'r car mewn gorsaf betrol ar Ffordd Blaenau'r Cymoedd (A465) ond gyrrodd y car i ffwrdd yn gyflym. Roedd yn rhaid i swyddogion ymlid y dynion ond, ymhen tua 15 munud, bu gwrthdrawiad ar ôl i Ford achosi’r cerbyd i droelli. Aeth Ford a Barnham allan o'r car a dechrau rhedeg i ffwrdd, ond llwyddodd swyddogion i ddod o hyd iddynt yn gyflym a'u harestio.
Wrth gynnal chwiliad arferol ar ôl ei arestio, gwelwyd bod gan Ford 25 pecyn o heroin a 34 pecyn o gocên yn ei feddiant. Roedd y cyffuriau wedi cael eu selio ar wahân mewn dau dwb.
Roedd gan Barnham ffonau symudol, yr oedd un ohonynt yn perthyn i Ford, ac roedd y ddau ffôn hyn yn cynnwys negeseuon oedd yn ymwneud â chyffuriau.
Dywedodd Cwnstabl yr Heddlu David Coles: "Mae'n amlwg bod Liam Ford yn diystyru’r gyfraith yn gyfan gwbl. Hyd yn oed pan gafodd ei drwydded yrru ei thynnu, penderfynodd fynd y tu ôl i'r llyw beth bynnag.
Mae'r math hwnnw o ddirmyg tuag at wneud y peth iawn wedi arwain at ddedfryd hir o garchar."
