Dedfrydu dyn am uwchsbecian yng nghanol dinas Caerdydd

Diolch i waith rhagorol ditectifs gan ddefnyddio teledu cylch cyfyng, cafodd dyn ei ddwyn i gyfiawnder am uwchsbecian yng nghanol dinas Caerdydd.

Rydym yn dilyn cynifer o opsiynau ymchwilio â phosibl, gan gynnwys teledu cylch cyfyng, i olrhain y rheini sy'n gyfrifol am gyflawni troseddau ac i gael cyfiawnder i ddioddefwyr.

Ac yn yr achos hwn, roedd hyn yn hanfodol.

Cafodd yr heddlu eu galw i'r digwyddiad yng nghanolfan siopa Dewi Sant 2 fore dydd Llun 7 Gorffennaf.

Adroddodd menyw fod dyn anhysbys wedi ffilmio i fyny sgert ei merch a rhedeg i ffwrdd i gyfeiriad Ffordd Churchill.

Cafodd y person dan amheuaeth ei olrhain ar deledu cylch cyfyng yn ôl i'w gar a oedd wedi'i barcio yn Heol Fitzalan.

Drwy gynnal rhagor o ymchwiliadau darganfuwyd bod Alex Allegretto wedi'i enwi'n yrrwr ar y cerbyd, a chafodd ef ei arestio yn ei gartref ym Maesteg bedwar diwrnod yn ddiweddarach.

Cyfaddefodd y dyn 39 oed y drosedd o weithredu ffôn symudol o dan ddillad person arall er mwyn cael boddhad rhywiol

Plediodd yn euog a chafodd ei ddedfrydu yn Llys Ynadon Caerdydd ar 5 Awst.

Rhaid i Allegretto:

• Gofrestru gyda'r heddlu yn unol â Deddf Troseddau Rhywiol 2003 am bum mlynedd
• Gwneud 140 awr o waith di-dâl
• Cwblhau Gofynion Gweithgarwch Adsefydlu.

Dywedodd y swyddog yn yr achos, y Rhingyll Luis Antony, o Heddlu De Cymru:

"Mae gan bawb yr hawl i deimlo'n ddiogel, ble bynnag maen nhw, ac ni ddylai neb fod yn destun y math yma o drosedd.
"Mae'r digwyddiad hwn yn parhau i gael effaith ar y dioddefwr. Mae hi'n poeni am bobl sy'n cerdded y tu ôl iddi ac mae hi'n bryderus pan fydd hi'n mentro allan.
"Drwy ymholiadau teledu cylch cyfyng helaeth, roedd modd i ni olrhain y person dan amheuaeth cyn, yn ystod ac ar ôl y drosedd.
"Mae'r delweddau'n dangos yn glir bwriad Alex Allegretto a'r hyn a wnaeth i'r ferch ifanc hon tra roedd hi allan yn siopa gyda'i mam.
"Gobeithio bydd y canlyniad yn y llys yn rhoi rhywfaint o gysur iddi ac yn ei galluogi i fagu ei hyder eto."