Carchar i ddyn o Ben-y-bont ar Ogwr am droseddau cyffuriau

Bu’n rhaid i swyddogion ddilyn y dyn ar droed ym Mhen-y-bont ar Ogwr ym mis Mehefin eleni.

Dedfrydwyd Craig Larkin, 46 oed o Wildmill ym Mhen-y-bont ar Ogwr, i bum mlynedd o garchar yn dilyn ei euogfarn.

Cafodd Larkin ei ddedfrydu yn Llys y Goron Caerdydd ddydd Gwener 14 Awst, lle plediodd yn euog i gyhuddiad o fod â chrac cocên yn ei feddiant gyda'r bwriad o'i gyflenwi a chyhuddiad o fod â heroin yn ei feddiant gyda'r bwriad o'i gyflenwi.

Daw hyn ar ôl i swyddogion gynnal patrolau yn ardal Wildmill ym Mhen-y-bont ar Ogwr yn ystod oriau mân y bore ym mis Mehefin. Gwnaeth swyddogion weld Larkin yn cario gwrthrych mawr wrth iddynt yrru i lawr St Andrews Road. Roedd yr heddlu yn ymwybodol bod Larkin wedi delio cyffuriau yn y gorffennol.

Stopiodd swyddogion y car i siarad â Larkin ond fe redodd i ffwrdd yn ystod y sgwrs. Wrth i swyddogion redeg ar ei ôl, gollyngodd Larkin sawl dilledyn a bag. Llwyddodd swyddogion i’w ddal a'i arestio ac, wrth ei chwilio, daethant o hyd i gyffuriau dosbarth A yn y bag a siaced denau goch tywyll.

Wrth archwilio’r siaced, daeth swyddogion o hyd i ffôn symudol arall, clorian, carreg o bowdr gwyn cywasgedig a bag yn cynnwys pecynnau roedden nhw'n credu eu bod yn cynnwys heroin.

Dywedodd Cwnstabl yr Heddlu Rhodri Wilson: "Allwch chi ond dechrau dychmygu effaith negyddol y cyffuriau mae Craig Larkin wedi'u gwerthu ar y rhai hynny sydd wedi eu cymryd, heb sôn am eu ffrindiau, eu teulu a'u cymunedau ehangach.

"Dyma ddedfryd dda arall yn ymwneud â chyffuriau, sy'n anfon neges glir nad yw'r fasnach gyffuriau yn talu yn y diwedd - bydd ein swyddogion yn eich dal a byddwch chi'n mynd i'r carchar.