Dedfrydu dyn o Lansawel i 17 mlynedd yn y carchar am dreisio a throseddau rhywiol

Mae dyn o Gastell-nedd Port Talbot wedi cael dedfryd estynedig ar ôl iddo gael ei ddyfarnu'n euog o gyflawni nifer o droseddau rhywiol.

Cafwyd Talvinder Atwal, 24 oed o Lansawel, yn euog ym mis Gorffennaf o sawl achos o dreisio ac ymosod ar fenyw. Fe'i cafwyd yn euog hefyd o dagu'r un dioddefwr yn fwriadol.

Cafwyd Atwal, a oedd wedi pledio'n ddieuog i bob cyhuddiad, yn euog o ddau gyhuddiad o dreisio, cyhuddiad o ymosod drwy dreiddio, cyhuddiad o dagu bwriadol, dau gyhuddiad o ymosod ar fenyw yn rhywiol a chyhuddiad o ymddygiad rheolaethol/gorfodaethol.

Mae wedi cael dedfryd estynedig o 17 mlynedd yn y carchar.

Dywedodd y Ditectif Arolygydd Meirian Evans:

"Gwnaeth Talvinder Atwal fywyd ei ddioddefwr yn uffern drwy ei gorfodi hi i ddioddef troseddau rhywiol dro ar ôl tro.

"Mae hyd y ddedfryd a roddwyd yn dangos arwyddocâd a difrifoldeb ei droseddau.

"Fe wnaeth e dreisio ei ddioddefwr ac mae ei weithredoedd yn gwbl warthus. Rydym yn canmol dewrder y dioddefwr wrth ddod i siarad â ni, ac yn gobeithio y gall hi ddechrau symud ymlaen gyda'i bywyd yn awr."

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a riportio digwyddiadau o'r math.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Ceir cyfoeth o wybodaeth a manylion am wasanaethau cymorth yma.