Carcharu dau o Gaerdydd am eu rhan yn cyflenwi cyffuriau Dosbarth A

Mae dau ddyn o Gaerdydd wedi cael eu carcharu ar ôl pledio'n euog i ymwneud â chyflenwi cyffuriau Dosbarth A.

Roedd Kieran Chapman, 29 oed o Laneirwg, a Keanu Hicks, 26 oed o Adamsdown, mewn cerbyd wedi'i rentu pan gawsant eu stopio gan swyddogion ar Heol Casnewydd ar 9 Ebrill 2025.

Cafodd y cerbyd ei chwilio a daethpwyd o hyd i sawl pecyn o grac cocên a heroin. Atafaelwyd ffonau symudol a swm sylweddol o arian parod hefyd. Roedd un ffôn, y daethpwyd o hyd iddo ym mlwch menig y cerbyd, yn gysylltiedig â llinell gyffuriau.

Plediodd Chapman yn euog i ymwneud â chyflenwi cocên a heroin ac mae wedi cael ei ddedfrydu i bedair blynedd a phum mis yn y carchar.

Plediodd Hicks yn euog i fod â chocên a heroin yn ei feddiant gyda'r bwriad o'u cyflenwi ac mae wedi cael ei ddedfrydu i dair blynedd a phedwar mis yn y carchar.

Cafodd cartref Chantelle Johnson, 36 oed o ardal Gabalfa, Caerdydd, a oedd yn gyrru'r cerbyd, ei chwilio yn dilyn yr arestiadau. Daethpwyd o hyd i ganabis yn ystod y chwiliad, ynghyd â chasinau dryll a gwasgod wrthfwledi. Mae hi wedi cael dedfryd o dair blynedd o garchar, wedi'i gohirio am 30 mis.

Dywedodd y Ditectif Ringyll Lia Jones:

"Roedd yn amlwg ar unwaith, o'r swmp o gyffuriau ac arian a ganfuwyd yn y car pan gawsant eu harestio, fod gan y tri unigolyn hyn gysylltiadau cryf â throseddau’n ymwneud â chyffuriau Dosbarth A. Roedd arogl canabis cryf iawn hefyd.

Fe wnaeth yr ymchwiliad dilynol gadarnhau’r cysylltiadau troseddol hyn. Fel cynifer o ddrwgweithredwyr eraill yn y gorffennol, dyma bobl sydd wedi penderfynu gwerthu cyffuriau Dosbarth A er mwyn elwa’n ariannol, heb boeni dim am y niwed y bydd y cyffuriau hyn yn ei wneud i'r rheini sy'n eu defnyddio yn y pen draw, yn ogystal â'u teuluoedd a’r gymuned ehangach.

"Carchar yw'r lle cywir iddynt, a dyna’n union lle maen nhw'n mynd."