Carchar i ddyn o Sandfields ar ôl iddo ddwyn allweddi car cyn cael damwain

Mae dyn o Gastell-nedd Port Talbot wedi cael ei garcharu ar ôl pledio'n euog i nifer o droseddau, gan gynnwys byrgleriaeth.

Aeth Marcus Thomas, 37 oed o Sandfields, i mewn i gartref ar Arthur Street ym Mhort Talbot fel tresmaswr yn ystod oriau mân 1 Mehefin a dwyn allweddi car o'r tŷ. Yna, baciodd y car i mewn i fan, gan achosi difrod i'r ddau gerbyd.

Yr un diwrnod, ceisiodd Thomas agor handlen drws tŷ arall ar y stryd mewn ymdrech i gael mynediad i'r eiddo, ond roedd y drws wedi'i gloi.

Ym mis Gorffennaf, plediodd Thomas yn euog i fyrgleriaeth, ymgais i gyflawni byrgleriaeth, y drosedd waethygedig cymryd cerbyd a difrodi cerbyd gwerth dros £5,000 a gyrru tra roedd wedi'i wahardd a heb yswiriant trydydd parti.

Mae Thomas wedi cael ei ddedfrydu i gyfanswm o bedair blynedd yn y carchar ac mae wedi'i wahardd rhag cael neu feddu ar drwydded yrru am bum mlynedd.

Dywedodd y Ditectif Gwnstabl Joseph Wilcox:

"Mae ymddygiad pobl fel Marcus Thomas yn gwneud i bobl deimlo'n anniogel yn eu cartrefi eu hunain.

"Roedd yn gwybod bod yr hyn yr oedd yn ei wneud yn anghywir, ond penderfynodd wneud hynny beth bynnag. Does dim lle i ymddygiad o'r fath ar strydoedd Castell-nedd Port Talbot, ac mae troseddwyr fel Marcus yn haeddu treulio cyfnod sylweddol yn y carchar."