Gyrrwr tacsi wedi'i garcharu am ymosod ar ddwy fenyw ar eu pen eu hunain yng Nghaerdydd

Cafodd Amanuele Mebrahtu o Dreganna, Caerdydd, ei adnabod ar ôl chwiliad helaeth o ddeunydd teledu cylch cyfyng a oedd yn ei ddangos ar droed ac yn ei gerbyd, yn teithio o ganol y ddinas i Cathays.

Darparodd ap ar ei ffôn, yr oedd yn ei ddefnyddio ar gyfer ei wasanaethau tacsi, leoliad byw fesul eiliad hefyd a oedd yn cyfateb yn union i'r hyn a welwyd ar y deunydd teledu cylch cyfyng.

Er bod archwiliad fforensig wedi ei gysylltu'n ddiweddarach â dillad y dioddefwr drwy'r DNA ar ei ffrog, parhaodd Mebrahtu i wadu mai ef oedd yn gyfrifol am yr ymosodiadau a ddigwyddodd ym mis Hydref a mis Rhagfyr 2024.

Roedd y gyrrwr Uber wedi ymosod yn rhywiol ar deithiwr ar ôl ei gyrru'n ôl i'w chartref a gofyn iddi am gwtsh. Ar achlysur arall, roedd wedi ymosod yn rhywiol ar fenyw arall ar ôl cynnig ei chario ar ei gefn i lawr rhes o risiau.

Parhaodd y dyn 28 oed i wadu'r ddau honiad ond fe'i cafwyd yn euog yn Llys y Goron Casnewydd o ymosodiad rhywiol drwy dreiddio ac ymosodiad rhywiol drwy gyffwrdd.

Cafodd Mebrahtu ei ddedfrydu i saith mlynedd a thri mis yn y carchar, gyda chyfnod trwydded estynedig o dair blynedd, yn Llys y Goron Caerdydd ddydd Mawrth 4 Tachwedd.

Cafodd y diffynnydd hefyd ei wneud yn destun gofynion hysbysiad troseddwr rhyw a Gorchymyn Atal Niwed Rhywiol am gyfnod amhenodol.

Dywedodd y Ditectif Gwnstabl Shane Coombes o Heddlu De Cymru:

“Hoffwn ganmol dewrder a hyder y dioddefwyr wrth roi gwybod i'r heddlu, rhannu'r hyn a ddigwyddodd, a chefnogi'r ymchwiliad.
“Rwy'n gobeithio y bydd y canlyniad yn y llys yn rhoi rhywfaint o gysur iddynt bod cyfiawnder wedi cyrraedd y troseddwr a bod eu dewrder wedi helpu i amddiffyn y cyhoedd ehangach rhag niwed.
“Mae rheibiwr peryglus bellach oddi ar ein strydoedd.”

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.

• Yn unol â pholisi cyfryngau HDC, gofynnwyd i'r dioddefwyr am eu safbwyntiau mewn perthynas â rhyddhau llun dalfa Amanuele Mebrahtu.
• Ar ôl ymgynghori, rydym yn parchu cais dioddefwr i beidio â rhyddhau ei lun.