Gwrthdrawiad Traffig Ffyrdd Angheuol Llantrisant – Dioddefwr wedi'i enwi a'i deulu wedi talu teyrnged iddo

Ddydd Mercher 22 Hydref, bu farw cerddwr – Michael Griffiths, 45 oed – ar ôl bod mewn gwrthdrawiad â char ar Heol-Y-Sarn, Llantrisant, ychydig cyn 6pm.
Digwyddodd y ddamwain gyferbyn â phrif fynedfa'r Bathdy Brenhinol am 5.50pm ar 22 Hydref, 2025.

Roedd Michael o'r ardal leol, ac mae ei deulu wedi talu'r deyrnged ganlynol iddo:

"Roedd Michael yn fab annwyl, yn dad unigryw, yn frawd mawr bythgofiadwy i dri o frodyr a chwiorydd balch, ac yn ffrind ffyddlon i nifer. Mae colli Michael mewn ffordd mor drasig yn dristwch mawr i ni i gyd, ond rydym am ganolbwyntio nawr ar ddathlu'r person anhygoel ydoedd.

"Roedd gan Michael ymdeimlad cryf o gymeriad – caredig, hael a llawn bywyd. Roedd ei bersonoliaeth ddrygionus, ddireidus ar adegau, yn amlwg ym mhopeth yr oedd yn ei wneud. Bydd pob un ohonom yn cofio'r holl straeon doniol am anturiaethau, diwrnodau allan, a phrofiadau y gwnaethom eu rhannu â Michael.

"Pan oedd yn ifanc, gwnaeth Michael hyfforddi fel plastrwr, maes yr oedd ganddo ddawn naturiol ynddo. Dywedodd ei diwtor coleg un tro mai ef oedd un o'r myfyrwyr gorau iddo ei addysgu erioed. Aeth Michael ymlaen i ddefnyddio'r sgiliau hynny drwy gydol ei fywyd, gan ymfalchïo yn ei waith bob amser.

"Roedd yn arbennig o falch o'i waith maen â cherrig, crefft a ddysgodd gan ei Grancha annwyl. Dechreuodd Michael weithio ochr yn ochr ag ef fel plentyn a datblygodd yr un dalent naturiol yn y grefft yn gyflym. Parhaodd i fireinio ei waith maen â cherrig drwy gydol ei fywyd gan adeiladu waliau cerrig prydferth ar hyd mynyddoedd y cymoedd – gwaith yr oedd yn ymfalchïo'n fawr ynddo. Un o'r pleserau mwyaf oedd bod ei fab ei hun wedi gallu rhannu profiadau tebyg â Michael, fel yr oedd Michael wedi'i wneud gyda'i Grancha.

"Roedd Michael hapusaf yn yr awyr agored. P'un a oedd yn gwibio ar feic mynydd, yn heicio drwy'r cymoedd, neu'n pysgota'n dawel wrth yr afon, roedd yn mwynhau rhyddid a heddwch byd natur. Roedd hefyd yn mwynhau ychydig o gystadleuaeth gyfeillgar ac yn olffiwr brwdfrydig, yn chwaraewr dartiau, ac wrth ei fodd yn chwarae pŵl – ac er rwystredigaeth i bawb, roedd yn dda iawn ym mhob un ohonynt.

"Byddwn hefyd yn cofio Michael am ei ddull greddfol o hyfforddi cŵn. Bu ganddo nifer o gŵn yn ystod ei fywyd, ac roedd yn dwlu ar bob un ohonynt ac yn gwbl ymroddedig iddynt. Byddai'n eu hyfforddi mewn ffordd a oedd yn golygu eu bod yn gariadus ac yn ffyddlon iawn iddo yntau, a dim ond nodio arnynt y byddai angen i Michael ei wneud, a byddent yn gwrando.

"Rydym yn cael cysur o ddychmygu bod Michael nawr mewn heddwch, rywle yn uchel ar fynydd gyda'i gŵn annwyl wrth ei ochr. Bydd yn byw yn ein cof, yn y straeon y byddwn yn eu hadrodd, ac, yn bennaf oll, drwy ei deulu a'i fab."

Gall unrhyw un sydd â gwybodaeth gysylltu â 101 – dyfynnwch y cyfeirnod 2500338095.