Gwasanaeth Coffa Blynyddol Heddlu De Cymru 2025

Ddoe, cynhaliwyd ein Gwasanaeth Coffa blynyddol ym mhencadlys yr heddlu er mwyn anrhydeddu'r rhai sydd wedi aberthu eu bywydau mewn dau Ryfel Byd a rhyfeloedd eraill, ac i gofio am ein cydweithwyr sydd wedi marw wrth wasanaethu gyda ni.

Arweiniwyd y gwasanaeth eleni gan y Prif Gwnstabl Jeremy Vaughan ac roedd yn cynnwys anerchiad gan Gomisiynydd yr Heddlu a Throseddu, Emma Woods. Roedd yr achlysur hefyd yn dathlu 80 mlynedd ers cyhoeddi heddwch yn Ewrop a'r Dwyrain Pell a chanmlwyddiant Cofeb Rhyfel Heddlu Morgannwg sydd wedi'i lleoli o flaen prif adeilad y Pencadlys.

Oherwydd arwyddocâd yr achlysur eleni, gosododd gwesteion a oedd yn cynrychioli'r Fyddin, y Llynges a'r Llu Awyr Brenhinol dorchau, yn ogystal â Syr Gareth Rhys-Williams, y dadorchuddiodd ei dad-cu, Syr Rhys Rhys-Williams, Gofeb Rhyfel Heddlu Morgannwg yn wreiddiol yng Nghaerdydd yn 1925 ac unwaith eto yn 1948 ar ôl iddi gael ei symud i'w lleoliad presennol.

Yn ystod y Gwasanaeth, gosodwyd torchau pabi wrth Gofeb Rhyfel yr Heddlu i anrhydeddu'r rhai a fu farw wrth wasanaethu gyda lluoedd arfog ein gwlad. Gosodwyd blodau hefyd wrth Ddeial Haul Coffa ein heddlu i gofio am swyddogion a staff yr heddlu a fu farw wrth wasanaethu.

Dywedodd y Prif Gwnstabl Jeremy Vaughan:

“Mae hwn yn achlysur teimladwy ac mae'n briodol ein bod yn parhau i ddangos ein parch a'n diolchgarwch i'r rhai a fu farw – nid dim ond yma, ond ledled y wlad. Mae seremonïau fel hon yn dod â'n cymunedau at ei gilydd, gan ein hatgoffa o'n dynoliaeth gyffredin ac atgyfnerthu'r hyn sy'n ein clymu wrth ein gilydd mewn cyfnodau o gynnwrf ac aflonyddwch.

Gadewch i ni fyfyrio, nid yn unig ar gost gwasanaethu, ond hefyd ar yr anrhydedd o wneud hynny. Mae gwaddol ein swyddogion a fu farw, y personél milwrol a'n cydweithwyr ym mhob un o'r gwasanaethau brys a chyhoeddus, yn parhau yn y gwaith a wnawn, y bywydau a gyffyrddwn a'r cymunedau rydym yn eu diogelu. Mae eu dewrder, eu teyrngarwch a'u haberth yn ein hysbrydoli i barhau i symud ymlaen, ni waeth beth fo'r heriau rydym yn eu hwynebu.”