Carcharu dyn am 30 o flynyddoedd am droseddau rhyw yn erbyn plant

Mae dyn o Abertawe wedi cael dedfryd estynedig o 30 mlynedd yn y carchar ar ôl cael ei ganfod yn euog o nifer sylweddol o droseddau rhyw yn erbyn plant.

Cyflawnodd Adam Davies, 36 oed o'r Hafod, y troseddau hyn yn erbyn nifer o ddioddefwyr dros gyfnod o sawl blwyddyn.

Ym mis Gorffennaf 2023, honnodd un o ddioddefwyr Davies ei fod wedi ymosod yn rhywiol arni pan oedd hi'n iau. Digwyddodd y troseddau yn erbyn y dioddefwr hwn a dioddefwr arall dros gyfnod o sawl blwyddyn. Roedd y ddwy ferch o dan 13 oed ar adeg y gamdriniaeth.

Fel rhan o'r ymchwiliad i'r honiad hwn, cafodd dyfeisiau Davies eu hatafaelu a daethpwyd o hyd i luniau cam-drin plant yn rhywiol Categori A, B a C ar ei liniadur.

Ym mis Ebrill 2025, datgelodd dioddefwr gwrywaidd fod Davies wedi ei gam-drin yn rhywiol pan oedd rhwng 6 ac 8 oed.

Plediodd Davies yn ddieuog i restr hir o droseddau, ond fe'i cafwyd yn euog yn y llys o'r troseddau canlynol:

• Treisio plentyn o dan 13 oed (pedwar achos)
• Ymosod ar blentyn o dan 13 oed drwy dreiddio (dau achos)
• Ymosod yn rhywiol ar blentyn o dan 13 oed (saith achos)
• Ymosod yn rhywiol (dau achos)
• Gweithgarwch rhywiol â phlentyn (un achos)
• Achosi/annog plentyn o dan 13 oed i gymryd rhan mewn gweithgarwch rhywiol (dau achos)
• Bod â lluniau anweddus o blentyn yn ei feddiant - categori A, B a C (tri achos)

Mae Davies wedi cael dedfryd estynedig o 30 mlynedd yn y carchar, a bydd yn treulio 26 mlynedd o'r ddedfryd honno yn y ddalfa. Bydd yn y carchar am o leiaf 18 mlynedd.

Bydd yn droseddwr rhyw cofrestredig am weddill ei oes, ac yn destun Gorchymyn Atal Niwed Rhywiol.

Dywedodd y Ditectif Gwnstabl Stacey Jones:

“Mae troseddau Adam Davies ymhlith y gwaethaf o'u math yn Abertawe. Cymerodd fantais o sawl plentyn mewn ffordd afiach i gyflawni gweithredoedd erchyll er mwyn ei bleser rhywiol anfoesol ei hun.

“Mae'n berygl aruthrol i blant, ac mae'r strydoedd yn llawer iawn mwy diogel i bobl ifanc nawr ei fod wedi cael ei anfon i'r carchar am gyfnod sylweddol iawn.

“Nid oedd Adam Davies yn poeni dim am sut y byddai ei droseddau yn effeithio ar fywydau ei ddioddefwyr, yn feddyliol ac yn gorfforol. Rydym yn talu teyrnged i ddewrder eithriadol y dioddefwyr a roddodd wybod i ni, ac yn gobeithio y gallant symud ymlaen gyda'u bywydau, gan wybod na allai Adam Davies gysylltu â nhw mwyach.”

Os yw'r stori hon wedi effeithio arnoch, cysylltwch â Heddlu De Cymru drwy ffonio 101, gan ddyfynnu'r cyfeirnod 62WN0407323.

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.