Atafaelu fêps anghyfreithlon ar ôl i fusnes fethu â gofyn am fanylion adnabod gan Wirfoddolwr Ieuenctid yr Heddlu
Cynnwys y prif erthygl
Gweithiodd ein Tîm Diogelwch Cymunedol mewn partneriaeth ag adran Safonau Masnach Cyngor Castell-nedd Port Talbot yr wythnos diwethaf i gynnal profion prynu mewn busnesau sy'n gwerthu tân gwyllt a fêps yn ardal Castell-nedd Port Talbot.
Ymwelodd Gwirfoddolwyr Ieuenctid yr Heddlu â'r safleoedd i brofi a fyddent yn dilyn y protocol o ran gwerthu'r eitemau hyn i blant dan oed.
Ymhlith y pum busnes yr ymwelwyd â nhw, roedd dau yn gwerthu tân gwyllt, ac roedd yn dda gweld bod y ddau wedi gofyn i'r gwirfoddolwyr gadarnhau a oeddent dros 18 oed.
Ymhlith y busnesau eraill, gwerthodd un busnes yn Rhyd-y-fro fêp i wirfoddolwr 15 oed.
Cynhaliwyd ymholiadau â'r gwerthwr a rheolwr y siop wedi hynny, a chafodd dros 100 o fêps tafladwy yr amheuwyd eu bod yn anghyfreithlon eu hatafaelu gan gydweithwyr Safonau Masnach. Cafodd 84 eu dychwelyd maes o law ar ôl i waith craffu pellach ddangos eu bod yn gyfreithlon.
Bydd yr adran Safonau Masnach yn gwneud ymholiadau pellach gyda chyfanwerthwr lleol yr honnir ei fod yn cyflenwi'r fêps tafladwy, y cyhoeddwyd eu bod anghyfreithlon yn gynharach eleni.
Cafodd dwy siop arall yng Nghastell-nedd eu profi hefyd, a wrthododd gwerthu'r fêps i'r gwirfoddolwyr ar ôl gofyn am fanylion adnabod ganddynt.
Dywedodd PCSO Andrew Neal:
“Mae'r gyfraith mewn perthynas â gwerthu tân gwyllt a fêps yma am reswm - gall y ddau fod yn beryglus iawn mewn dwylo anghyfrifol.
“Mae'n dda gweld bod y rhan fwyaf o'r busnesau yr ymwelwyd â nhw yn ystod yr ymgyrch hon yn cydymffurfio â'r ddeddfwriaeth, ond mae hefyd yn siomedig gweld bod un busnes wedi cael ei ddal yn gwerthu cynhyrchion i blant ac y canfuwyd yn ddiweddarach ei fod yn cadw eitemau anghyfreithlon mewn stoc.
“Roedd hyn hefyd yn gyfle gwych i arddangos y gwaith pwysig a wneir gan ein Gwirfoddolwyr Ieuenctid yr Heddlu – da iawn i'r rhai dan sylw.”
Dywedodd y Cynghorydd Cen Phillips:
“Mae asiantaethau gorfodi yn rhannu gwybodaeth am weithgarwch o'r fath ac yn cydlynu camau gweithredu lle y bo'n bosibl i ddiogelu'r cyhoedd a helpu i atal ymddygiad gwrthgymdeithasol.
“Mae'r adran Safonau Masnach yn cynnal profion prynu a phrofion eraill yn rheolaidd ac yn rhoi cyngor i fusnesau ar eu rhwymedigaethau mewn perthynas â gwerthu i blant dan oed a diogelwch cynhyrchion, gan gymryd camau gorfodi lle y bo angen i sicrhau bod yr holl gynhyrchion a werthir yn ein cymuned yn ddiogel. Rydym yn croesawu'r cyfle hwn i gydweithio a rhannu gwybodaeth er budd y cyhoedd.”
“Os gwyddoch am unrhyw achos o werthu nwyddau sydd â chyfyngiad oedran yn anghyfreithlon, ffoniwch llinell gymorth i ddefnyddwyr Cyngor ar Bopeth: 0808 223 1133.”