Menyw oedrannus wedi colli £20k drwy dwyll

Rydym yn annog pobl i fod yn wyliadwrus ar ôl i fenyw oedrannus golli miloedd o bunnoedd a gemwaith o werth personol ar ôl cael ei thwyllo gan rywun a oedd yn esgus bod yn swyddog heddlu.

Cafodd £20k mewn arian parod ei ddwyn oddi wrth y dioddefwr o Gaerdydd, sydd yn ei hwythdegau, ddydd Gwener 28 Tachwedd.

Cafodd alwad ffôn yn gynharach y diwrnod hwnnw gan rywun a oedd yn honni ei fod yn swyddog heddlu, a ofynnodd iddi godi'r arian parod o'r banc. Yna, gwnaed trefniadau i'r arian gael ei gasglu o'i chartref.

Mae dyn wedi cael ei gyhuddo a bydd yn ymddangos gerbron Llys Ynadon Caerdydd heddiw (dydd Llun 1 Rhagfyr).

Mae ymchwiliad yn parhau.

Dywedodd y Ditectif Arolygydd Bob Chambers, o Heddlu De Cymru:

“Byddwch yn wyliadwrus iawn yn ystod y cyfnod cyn y Nadolig a chadwch lygad ar berthnasau oedrannus.
"Mae twyllwyr yn targedu dioddefwyr, yn enwedig y rhai mwyaf agored i niwed, a byddant yn defnyddio tactegau amrywiol i gael eu manylion banc.
“Os byddwch yn cael unrhyw negeseuon testun sy'n honni eu bod gan eich banc yn gofyn i chi glicio ar ‘ddolenni’, peidiwch â gwneud hynny. Dilëwch y negeseuon a chysylltwch â'ch banc ar unwaith.
“Hefyd, ni fydd yr heddlu byth yn gofyn i chi gadarnhau unrhyw fanylion banc drwy unrhyw un o'r llwyfannau cyfryngau cymdeithasol. Cysylltwch â Heddlu De Cymru os bydd rhywun yn gofyn i chi wneud hynny.” 

• Peidiwch byth â rhoi eich manylion banc na'ch manylion personol i unrhyw un nad ydych yn ei adnabod neu'n ymddiried ynddo. Mae'r wybodaeth hon yn werthfawr, felly gwnewch yn siŵr eich bod yn ei chadw'n ddiogel.
• Ni fydd swyddogion yr heddlu byth yn gofyn i unrhyw un godi arian parod nac yn gofyn am fanylion banc personol.

Gallwch cael rhagor o gyngor defnyddiol a all eich helpu chi neu anwylyd i gadw'n ddiogel rhag sgamwyr yma: https://www.south-wales.police.uk/cy-GB/cyngor/cyngor-a-gwybodaeth/Twyll/twyll/twyll-personol/twyll-personol-sut-atal/

Cysylltwch â Heddlu De Cymru drwy un o'r ffyrdd canlynol.

• Cysylltwch â ni ar-lein drwy https://www.south-wales.police.uk/cy-GB/riportio/riportio
• 101 neu Crimestoppers yn ddienw ar 0800 555 111.

Ffoniwch 999 bob amser mewn argyfwng.

Mae Cleonest Masser, 20 oed o Bentwyn, wedi cael ei gyhuddo o dwyll drwy ymhoniad anwir.