Mae Heddlu De Cymru yn ail-apelio am wybodaeth am yr ymosodiad ciaidd ar Leon Adams yn 2002

Goroesodd Leon Adams yr ymosodiad y tu allan i Orsaf Reilffordd Grangetown, ond bu angen gofal 24 awr arno am weddill ei oes.

Bu farw ar Ddydd San Steffan 2024 yn 47 oed.

Canfu cwest fod yr anaf a gafodd ar ei ymennydd yn yr ymosodiad yn 2022, pan oedd yn 24, wedi cyfrannu at ei farwolaeth.

Yn anffodus, er gwaethaf yr ymchwiliadau trylwyr a gynhaliwyd dros y ddau ddegawd diwethaf, nid yw'r ymosodiad ar Leon, pan gafodd ei gyflog ei ddwyn hefyd, wedi'i ddatrys.

Bellach, mae ditectifs yn gobeithio y bydd ple bersonol o'r newydd gan fam Leon, Angela, a chyhoeddiad bod gwobr arian parod yn cael ei chynnig gan Crimestoppers yn helpu i annog unrhyw un sydd â gwybodaeth i ddod ymlaen.

Mae'r elusen yn cynnig hyd at £20,000 am wybodaeth sy'n arwain at euogfarnu'r sawl sy'n gyfrifol am yr ymosodiad.

Dywedodd y Ditectif Uwch-arolygydd Mark O’Shea, o Heddlu De Cymru:

“Ymosodwyd yn greulon a chiaidd ar Leon i'r graddau lle cafodd ei adael yn anymwybodol y tu allan i orsaf drenau Grangetown.
“Yn syml, cafodd ei adael i farw.
“Hoffwn apelio ar unrhyw un sy'n gwybod pwy ymosododd ar Leon y diwrnod hwnnw.
“Rwy'n siŵr nawr, ac roeddwn i'n siŵr y tro diwethaf y gwnes i apelio am wybodaeth mewn perthynas â'r achos hwn, bod yr ateb o fewn cymuned Grangetown yng Nghaerdydd o hyd.
“Yn sicr, mae pobl yn gwybod pwy ymosododd ar Leol ar 14 Chwefror 2002 a byddwn yn apelio'n uniongyrchol iddynt gysylltu â ni.
“Mae ffynonellau di-enw wedi cysylltu â ni'n ddiweddar eleni, yn rhoi gwybodaeth am yr ymosodiad ar Leon, ac rwy'n apelio at y bobl hynny yn benodol i gysylltu â ni.
“Gwnewch hynny dros deulu Leon, yn arbennig ei fam sy'n daer am gael deall pwy ymosododd ar ei mab mewn ffordd mor greulon a barbaraidd, yn ôl yn 2002.
“Mae'n haeddu cael cysur yn yr achos hwn. Mae'n haeddu cael cyfiawnder yn yr achos hwn.
“Felly, plîs, rwy'n apelio arnoch yn uniongyrchol. Os byddwch yn gwybod unrhyw beth am bwy wnaeth ymosod ar Leon, cysylltwch â ni.”

Dywedodd mam Leon, Angela Main:

“Cefais i ddau fab yn achos Leon, sef y mab a fu fyw am 24 a hanner o flynyddoedd, a oedd fel pob un arall ohonom, yn byw bywyd normal, yn rhedeg o gwmpas, yn dwlu ar gyfrifiaduron a darlunio a phopeth felly.
“Ac yna, un diwrnod, gwnes i ei golli.
“A'r cwbl a oedd gen i oedd rhywun a oedd mewn cyflwr diymateb parhaus.
“Roedd ymchwiliad yr heddlu yn ddi-fai ac, wel, allan nhw ddim gwneud mwy oni fydd y sawl sy'n gwybod beth ddigwyddodd yn dod ymlaen.
“Roedd am gael gwybod pwy ydoedd, hoffwn i wybod er ei les ef, a'i deulu.
“Plis, dywedwch wrth rywun.”

Gellir cyflwyno gwybodaeth ar-lein yma: https://mipp.police.uk/operation/62WH020309A00-PO1

Fel arall, cysylltwch â ni gan ddyfynnu 1800044587:

• Cysylltwch â ni  drwy https://bit.ly/SWPProvideInfo
• Ffoniwch ar 101 neu Crimestoppers yn ddienw ar 0800 555 111.
• Ffoniwch 999 bob amser mewn argyfwng.