Gwnaed 15 o arestiadau, atafaelwyd 17 o gyllyll a gweithredwyd wyth gwarant ledled De Cymru yn ystod wythnos ddwysáu

Arweiniodd wythnos ddwysáu i fynd i'r afael â throseddau cyllyll at arestio pobl ac atafaelu ac ildio cyllyll ledled De Cymru.

Cymerodd Heddlu De Cymru ran yn yr wythnos ddwysáu genedlaethol rhwng 17 a 23 Tachwedd, sef ‘Sceptre’, gyda'r nod o fynd i'r afael â throseddau cyllyll.

Cynhaliodd swyddogion nifer o weithgareddau ymgysylltu ac ymgyrchoedd ychwanegol drwy gydol yr wythnos, gan gynnwys patrolau ychwanegol, ymgyrchoedd prawf-brynu, cyrchoedd cyllyll ac ymgysylltu â phobl ifanc mewn ysgolion.

At hynny, arweiniodd y gweithgarwch gweithredol at:

• 15 o arestiadau
• Gweithredu wyth gwarant
• Atafaelu 17 o gyllyll drwy finiau amnest
• Ildio dros 30 o gyllyll a chleddyfau, a oedd yn perthyn i un casglwr, yn ddiogel i dîm plismona yn y gymdogaeth
• Dros 180 o ymgysylltiadau cymunedol

Cafodd troseddau eraill eu canfod hefyd yn ystod y gweithgarwch gweithredol cynyddol. Wrth gynnal cyrch cyllyll yn seiliedig ar gudd-wybodaeth yn Llanisien, daethpwyd o hyd i bedwar wy plastig yn cynnwys bagiau zip llawn powdr yr amheuir ei fod yn gocên, gwerth rhwng £2400 a £2500.

Roedd gwarant hefyd yn Llanisien wedi arwain at atafaelu canabis a dau gleddyf ninja, ynghyd â £5000 mewn arian parod. Mae dyn wedi cael ei gyhuddo mewn cysylltiad â hyn.

Canfu achos o stopio a chwilio yn Abertawe gan y Tîm Plismona yn y Gymdogaeth ddyn a oedd â chanabis yn ei feddiant. Cafodd y canabis ei atafaelu a rhoddwyd datrysiad cymunedol iddo.

Dywedodd yr arweinydd troseddau cyllyll Jonathan Duckham: “Arweiniodd yr wythnos ddwysáu hon at rai canlyniadau gwych, ond roedd hefyd yn canolbwyntio'n gryf ar ymgysylltu â'r gymuned, addysgu pobl ifanc am beryglon cario cyllell, ynghyd â beth i'w wneud os byddant yn dod yn ymwybodol o rywun yn cario cyllell.

“Cynhaliodd timau brofion prynu mewn siopau hefyd gyda chymorth ein plant a'n pobl ifanc, gan ein galluogi i sicrhau bod siopau yn gwerthu eitemau yn gyfrifol.

“Rydym yn ymrwymedig i fynd i'r afael â throseddau cyllyll yn Ne Cymru, drwy fynd ar ôl y rhai sy'n cyflawni troseddau, yn ogystal ag ymdrin â'r mater yn gynnar drwy addysg ac ymgysylltu.”