Carcharu pâr o Sandfields am gyflenwi cyffuriau Dosbarth A

Mae dyn a menyw o Abertawe wedi cael eu carcharu ar ôl cael eu dal yn delio cyffuriau Dosbarth A.

Roedd Sion Harrison, 27 oed, a Kelly Hopkins, 35 oed, y ddau o Sandfields, Abertawe, mewn cerbyd pan welodd swyddogion ddefnyddwyr cyffuriau hysbys yn mynd tuag atynt ar Tontine Street.

Pan gafodd ei chwilio, daethpwyd o hyd i bedwar rholyn o heroin ym mhoced Hopkins. Daethpwyd o hyd i grac cocên posibl yn y drws ar ochr y gyrrwr. Canfuwyd ffôn symudol hefyd, a datgelodd ymchwiliad fod Harrison a Hopkins wedi bod yn ei ddefnyddio i drefnu i ddelio cyffuriau drwy negeseuon testun a Facebook Messenger.

Plediodd Harrison yn euog i ymwneud â chyflenwi cocên a chrac cocên. Mae wedi cael ei ddedfrydu i 45 mis yn y carchar.

Plediodd Hopkins yn euog i ymwneud â chyflenwi heroin, cocên, crac cocên a chetamin, yn ogystal â bod â chrac cocên a heroin yn ei meddiant gyda'r bwriad o'u cyflenwi. Mae wedi cael ei dedfrydu i 40 mis yn y carchar.

Dywedodd y Rhingyll Luke Tucker:

“Dewisodd Sion Harrison a Kelly Hopkins ymwneud â delio mewn cyffuriau Dosbarth A fel ffordd o elwa'n ariannol yn anghyfreithlon.

“Mae eu pledion euog a'u dedfrydau yn dangos nad oedd yr hwb ariannol dros dro yn werth chweil. Mae'r cyffuriau Dosbarth A hyn yn cael effaith ddifrifol ar y gymuned leol – a bydd carcharu'r ddau ddeliwr cyffuriau hyn yn sicrhau bod y gymuned yn fwy diogel.”