Carcharu dyn o Abertawe ar ôl treisio merch yn ei harddegau

Mae dyn o Abertawe wedi cael ei garcharu ar ôl cael ei ganfod yn euog o dreisio merch yn ei harddegau.

Plediodd Lukman Oyofo, 48 oed o ganol y ddinas, yn ddieuog i'r drosedd, ar ôl y digwyddiad yn ei fflat ar 6 Rhagfyr 2024. Ond, cyfaddefodd mewn cyfweliad ei fod wedi cael cyfathrach rywiol â'r dioddefwr, gan fynnu bod hyn yn gydsyniol.

Cafwyd Oyofo hefyd yn euog o ymosod ar ferch 13 oed a throsodd drwy dreiddio. Plediodd yn euog i ddau achos o ymosod ar ferch yn rhywiol am droseddau a ddigwyddodd 24 Tachwedd a 30 Tachwedd 2024.

Mae wedi cael ei ddedfrydu i ddeng mlynedd yn y carchar.

Dywedodd y Ditectif Gwnstabl Rabaiotti:

“Roedd Lukman Oyofo yn ymwybodol bod y gweithredoedd roedd wedi'u cyflawni ar blentyn yn anghyfreithlon, ond roedd yn dal i wneud hynny.

“Ni allai'r dioddefwr gydsynio gan ei bod dan oed. Camfanteisiodd Oyofo ar anghydbwysedd pŵer ac roedd yn ffynnu ar hynny, a gwneud hynny ar sawl achlysur.

“Rydym yn canmol dewrder y dioddefwr a wnaeth helpu i sicrhau'r euogfarn a'r ddedfryd hon drwy rannu'r hyn a wnaeth Oyofo."

Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.

Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.

Os ydych chi wedi cael eich cam-drin yn rhywiol, ac nad ydych yn barod i roi gwybod i'r heddlu amdano eto, peidiwch â dioddef yn dawel. Gellir dod o hyd i gyfoeth o wybodaeth a manylion am wasanaethau cymorth yma.