Carcharu dau o Abertawe ar ôl lladrad treisgar yng nghanol y ddinas

Mae dau ddyn wedi cael dedfryd o garchar am gyfnod sylweddol wedi iddynt ymwneud â lladrad yn Abertawe.

Aeth Ceri Gibson, 38 oed, heb gartref sefydlog, a Christopher Palmer, 36 oed, o'r Clâs, Abertawe, at ddyn 43 oed nad oeddent yn ei adnabod ar Page Lane. Tynnodd y ddau ddyn y dioddefwr i'r llawr o'r tu ôl iddo, a chlywyd un ohonynt yn gofyn iddo "ydy e werth cael dy drywanu drosto?" wrth i'r llall fynd drwy boced y dioddefwr a thynnu ei ffôn symudol allan.

Tynnodd y dioddefwr arian o'i boced arall o ganlyniad i fygythiadau pellach a wnaed gan y dynion, yn dweud eu bod am ei drywanu.

Cafodd Gibson a Palmer eu hadnabod drwy ddefnyddio technoleg adnabod wynebau.

Cafwyd Ceri Gibson yn euog o ladrad a chafodd dedfryd estynedig o naw mlynedd yn y carchar. Cafwyd Christopher Palmer hefyd yn euog o ladrad ac mae wedi cael ei garcharu am bum mlynedd.

Dywedodd y Ditectif Ringyll Griffiths:

"Roedd hwn yn lladrad treisgar lle gwnaeth Ceri Gibson a Christopher Palmer berswadio'r dioddefwr y byddai'n cael ei drywanu os nad oedd yn rhoi ei eiddo gwerthfawr iddynt.

“Gallai hyn fod wedi digwydd i unrhyw un. Roedd Gibson a Palmer allan ar y strydoedd yn chwilio am rywun a oedd ar ei ben ei hun ac yn agored i niwed ac yna gwnaethant ymosod yn llwfr o'r tu ôl i'r dioddefwr.

"Dyma'r eildro i'r ddau ddiffynnydd hyn gael euogfarn o ladrad y gwnaethant ei gyflawni gyda'i gilydd.

"Nid oes croeso i bobl fel hyn ar strydoedd Abertawe. Gyda dedfrydau hir i'r ddau ohonynt, bydd y ddinas yn lle gwell heb eu presenoldeb am flynyddoedd i ddod."