Archwilio tacsis yng nghanol y ddinas fel rhan o ymgyrch drwyddedu yn Abertawe

Ddydd Gwener diwethaf, cynhaliodd Tîm Trwyddedu Abertawe a Chastell-nedd Port Talbot ymgyrch drwyddedu tacsis ynghyd â'n cydweithwyr o dîm trwyddedu tacsis Cyngor Abertawe.

Roedd y dyddiad yn cyd-redeg â diwrnod cyntaf Ymgyrch Advent, sy'n cynnwys gweithgarwch plismona i sicrhau y gall ymwelwyr fwynhau economi nos canol y ddinas dros yr ŵyl, yn ogystal â diwrnod gweithredu Ymgyrch Chirk, a welodd unigolion dan amheuaeth yn cael eu rhoi yn y ddalfa.

Yn ystod y noson, cynhaliodd cerbydau heddlu wedi'u marcio batrôl o ganol y ddinas, a nodwyd tacsis Cerbyd Hacni a thacsis hurio preifat i'w tynnu ar gyfer hapwiriadau yn ein hardal archwilio. Yn ogystal â gwiriadau ffisegol a gynhaliwyd ar y cerbydau eu hunain, defnyddiodd swyddogion hefyd Gyfrifiadur Cenedlaethol yr Heddlu (PNC) a chronfeydd data eraill yr heddlu i sicrhau bod gyrwyr yn ddilys ac yn gweithredu'n gyfreithlon.

Tynnwyd cyfanswm o 17 o gerbydau i'r ardal archwilio, rhoddwyd hysbysiadau stopio ar dri ohonynt, sy'n eu hatal rhag gweithredu fel tacsi nes bod y diffygion a nodwyd â'u cerbydau yn cael eu hunioni. Rhoddwyd hysbysiad Adran 60 i un cerbyd - hysbysiad atal dros dro gohiriedig sy'n rhoi cyfnod o amser i'r gweithredwr ddatrys problem a nodwyd.

Dywedodd y Rhingyll James Ponting:

"Mae'n bwysig iawn bod unrhyw rai sy'n ymweld â chanol dinas Abertawe yn cael sicrwydd bod eu diogelwch yn hollbwysig pan fyddant yn defnyddio tacsi.

"Dyma pam bod yn rhaid i weithredwyr tacsi ddilyn deddfwriaeth benodol i sicrhau bod eu cerbydau a'u gyrwyr yn addas ar gyfer y ffordd.

"Mae'r ymgyrch hon yn amlinellu ymhellach y pwyslais rydym yn ei roi ar ddiogelwch cymunedol – rydym am i bobl ddod a mwynhau canol y ddinas a dychwelyd adref yn ddiogel wedyn."

Dywedodd Andrew Williams, Aelod o'r Cabinet ar gyfer Gwasanaethau Corfforaethol:

"Drwy'r flwyddyn, ond yn enwedig yn ystod cyfnod yr ŵyl pan mae'r galw am dacsis a cherbydau hurio preifat yn uchel, rydym am i bobl deimlo'n ddiogel wrth ddefnyddio'r gwasanaethau hyn.

"Dyna pam ein bod yn falch o fod yn rhan o'r math hwn o waith, ac mae canlyniadau Ymgyrch Beccles yn dangos pa mor bwysig yw hi ein bod ni a'r heddlu yn cymryd camau i sicrhau bod cerbydau a gyrwyr yn addas at y diben. Mae diogelu unigolion agored i niwed a galluogi teithio diogel i'n dinas ac oddi yno yn parhau i fod yn un o flaenoriaethau pennaf Cyngor Abertawe.”