Llofruddiaeth James Brogan: Dyn 21 oed wedi'i garcharu am oes

Mae Georgie Tannetta, 21 oed, wedi cael ei ddedfrydu i garchar am oes am lofruddio James Brogan yn Llaneirwg, Caerdydd.
Daethpwyd o hyd i James Brogan gydag anafiadau difrifol ger y parc ‘trên’ ar Coleford Road, Llaneirwg, a bu farw yn yr ysbyty yn fuan wedyn ar 12 Tachwedd, 2024.
Roedd wedi ei drywanu yn ei fraich gan Tannetta a achosodd ataliad ar y galon.

Dywedodd merch James, Sophie: "Roedd fy nhad yn fwy na tad; ef oedd canolbwynt ein teulu. Pe bai angen cymorth ar rywun, byddai yno. Dyna'r math o ddyn ydoedd. Hebddo rydym yn teimlo wedi torri, ac yn teimlo ar goll. Nid oes dim y gallwn ei ddweud i ddod ag ef yn ôl, ond gallwn siarad am yr hyn rydym wedi ei golli.
"Roedd yn dad, yn fab, yn frawd, yn ewythr ac yn ffrind. Roedd pawb a oedd yn ei adnabod yn ei garu, ac mae ei golli fel hyn wedi bod yn annioddefol.
“Dyw cario cyllell ddim yn ddiniwed. Mae risg i wneud hynny ac mae'n arwain at boen. A gall ddiweddu bywydau. Mae marwolaeth ein tad yn ein hatgoffa bod canlyniadau i'r math hwn o drais."

Gwadodd Tannetta, o Trowbridge, Caerdydd, ddynladdiad a bod ag eitem lafnog yn ei feddiant ond fe'i cafwyd yn euog o lofruddiaeth gan reithgor yn Llys y Goron Casnewydd ym mis Mai.

Heddiw, cafodd ei ddedfrydu yn Llys y Goron Caerdydd i garchar am oes a dywedwyd wrtho fod yn rhaid iddo aros yn y carchar am o leiaf 22 mlynedd.

Dywedodd y Ditectif Arolygydd Rebecca Merchant, o Dîm Ymchwilio i Droseddau Mawr Heddlu De Cymru: “Roedd teulu a ffrindiau James Brogan yn meddwl y byd ohono. "Mae ei farwolaeth wedi gadael bwlch mawr yn eu bywydau.
“Rydym yn meddwl am ei deulu heddiw fel yr ydym wedi gwneud drwy gydol yr amser.
"Rydym yn gobeithio y bydd y ddedfryd heddiw yn rhoi rhywfaint o heddwch iddynt ac yn eu galluogi i ddechrau'r broses o wella.
"Yn anffodus, mae'r achos trychinebus hwn, unwaith eto, yn tynnu sylw at ganlyniadau ofnadwy a phellgyrhaeddol troseddau sy'n ymwneud â chyllyll. 
"Ni fydd cario cyllyll ar ein strydoedd yn cael ei oddef.
"Bydd Heddlu De Cymru yn parhau i weithio'n ddiflino i dargedu ac atal y rhai sy'n ymwneud â'r math o drosedd a arweiniodd at farwolaeth James.
“Os byddwch yn amau y gall rhywun fod yn cario cyllell, cysylltwch â'r heddlu. Gallai rhoi gwybod am hyn achub bywyd rhywun.”

🗪 Sgwrs Fyw https://www.south-wales.police.uk/cy-GB/

💻 Rhowch Wybod Ar-lein https://www.south-wales.police.uk/cy-GB/riportio/riportio

📞 101 neu Crimestoppers yn ddienw ar 0800 555 111.

Ffoniwch 999 bob amser mewn argyfwng.