Heddlu De Cymru yn cefnogi cynllun ildio cleddyfau ninja cenedlaethol

Caiff y cynllun ildio ac iawndal cenedlaethol ei gynnal rhwng 1 a 31 Gorffennaf, cyn i gleddyfau ninja gael eu gwahardd o 1 Awst 2025. Bydd hyn yn ei gwneud yn anghyfreithlon i rywun fod â'r arfau angheuol hyn yn ei feddiant, eu cynhyrchu, a'u mewnforio. 

Anogir y cyhoedd i gyflwyno'r arfau hyn yn ddiogel yn un o'r gorsafoedd heddlu canlynol:

• Canol Abertawe
• Castell-nedd
• Bae Caerdydd
• Y Barri
• Pen-y-bont ar Ogwr
• Merthyr Tudful
• Pontypridd

Dod o hyd i orsaf heddlu | Heddlu De Cymru  

Yn ystod y cyfnod ildio, rhwng 1 a 31 Gorffennaf, gall y rhai sy'n ildio cleddyfau ninja aros yn ddienw heblaw eu bod yn dymuno hawlio iawndal.

Dywedodd Donna Llewellyn, Uwch-arolygydd ac arweinydd troseddau cyllyll:

“Rydym yn deall y gall fod diffyg ymwybyddiaeth o gyfreithlondeb arfau gwahanol, neu ddiffyg dealltwriaeth o'r ffordd orau o gael gwared arnynt. Mae'r cynllun ildio yn cynnig ffordd ddiogel o ildio'r arfau hyn ac yn osgoi'r risg y byddant yn mynd i'r dwylo anghywir."

Gweler canllawiau'r Swyddfa Gartref ar ildio cleddyfau ninja a hawlio iawndal ynghyd â'r ffurflen iawndal a'r hysbysiad gwybodaeth am breifatrwydd yma.

Mae'r llywodraeth yn ystyried pob ffordd o ddiogelu pobl ifanc a mynd i'r afael â'r arfer o gario cyllyll fel rhan o'i Chynllun Newid. Mae'r genhadaeth i haneru troseddau cyllyll yn rhan o genhadaeth ar draws Whitehall i wneud y canlynol:

• cyfyngu ar argaeledd cyllyll ar-lein
• dwyn y rhai sy'n gyfrifol am werthu cyllyll yn anghyfrifol i gyfrif
• cynnig cymorth gwell ar gam cynnar i bobl ifanc sy'n debygol o droseddu

#DdimYrUn

Ymgyrch ymyrryd yn gynnar yw #DdimYrUn sydd â'r nod o ddarbwyllo pobl ifanc 11-16 oed i beidio â chario cyllyll. Mae'n pwysleisio na fydd cario cyllell yn eich cadw'n ddiogel. Yn wir, mae ystadegau'n dangos ei bod yn fwy tebygol y byddwch yn cael eich brifo.

 Arweinir yr ymgyrch hon gan Heddlu De Cymru ac Uned Atal Trais Cymru, gyda chymorth cyllid gan Gomisiynydd yr Heddlu a Throseddu De Cymru. Mae'n seiliedig ar gyngor gan blant, pobl ifanc, gweithwyr proffesiynol ym maes addysg a gweithwyr ieuenctid yn Ne Cymru, a'u profiadau.