Gyrrwr di-hid a wyrodd oddi ar y ffordd a lladd mam i ddau wedi'i garcharu

Mae dyn o Ferthyr Tydfil wedi cael ei garcharu am ladd Catherine Bradford pan gollodd reolaeth dros gar roedd yn ei yrru drwy bentref Dowlais ar 19 Medi 2022.

Ymddangosodd Alex Rickwood, 32 oed, o Wern Isaf, Dowlais, gerbron Llys y Goron Merthyr Tudful i gael ei ddedfrydu ddydd Llun, 30 Mehefin.

Cyn iddo ymddangos gerbron y llys ym mis Mai (2025), fwy na dwy flynedd a hanner ers y digwyddiad, newidiodd ei bledion dieuog o achosi marwolaeth drwy yrru'n beryglus, achosi marwolaeth drwy yrru cerbyd heb yswiriant, a defnyddio plât masnach yn dwyllodrus, i bledion euog.

Ar adeg y digwyddiad, roedd yn gyrru car MG ZR yn 'ofnadwy o gyflym', yn ôl un llygad-dyst. Roedd ei ffrind – perchennog y car – yn teithio yn sedd blaen y car ar y pryd. Collodd Rickwood reolaeth dros y car ar dro ar High Street, Dowlais, gan yrru'n syth i mewn i Catherine Bradford, a oedd ar y palmant ar y pryd.

Cafodd y fam 52 oed ei tharo â chymaint o rym fel bod llygad-dyst wedi dweud ei fod wedi gweld malurion o'r car yn hedfan drwy'r awyr, cyn sylweddoli mai Catherine ydoedd. Disgynnodd polyn lamp y gwnaeth y car ei daro i'r llawr.

Stopiodd yr aelod cyntaf o'r cyhoedd i gyrraedd lleoliad y gwrthdrawiad ei char a rhedodd draw at Catherine a oedd yn gorwedd ar lain glaswellt. Rhoddodd CPR nes i'r parafeddygon, gan gynnwys aelodau o griw'r Ambiwlans Awyr, gyrraedd a chymryd drosodd, ond bu eu hymdrechion yn ofer a chafodd ei datgan yn farw yn y fan a'r lle. Credir bod grym y gwrthdrawiad wedi ei lladd yn syth.

Cafodd Alex Rickwood fân doriadau a chleisiau a thorrodd ei ffrind – a ddywedodd wrth y swyddogion fod y car yn cael ei yrru'n rhy gyflym – ei fraich.

Defnyddiodd Rickwood, mecanydd a gyrrwr cerbyd nwyddau trwm cymwysedig, blât masnach yn dwyllodrus wrth yrru'r car.

Ymddangosodd gerbron Llys y Goron Caerdydd ddydd Llun, 30 Mehefin, lle cafodd ei garcharu am bum mlynedd a phum mis, a'i wahardd rhag gyrru am fwy na saith blynedd.

Dywedodd y Ditectif Gwnstabl Matthew Jones, Ymchwilydd i Wrthdrawiadau Difrifol: "Mae calonnau teulu Catherine wedi'u torri ac rwy'n gobeithio y bydd rheithfarn heddiw yn eu galluogi i symud ymlaen rhywfaint o'r trychineb hwn, ac y gallant ddechrau ailadeiladu eu bywydau.

"Fel mecanydd a gyrrwr proffesiynol, dylai Alex Rickwood fod wedi gwybod yn well. Roedd yn anghyfrifol ac yn ddi-hid ac mae ei weithredoedd y diwrnod hwnnw wedi newid bywydau llawer o bobl, yn enwedig ei fywyd ei hun – dylai gymryd yr amser sylweddol y bydd yn ei dreulio yn y carchar i fyfyrio ar y dewisiadau a wnaeth a'r dinistr y gwnaethant ei achosi.

"Mae car yn y dwylo anghywir yn arf angheuol – yn anffodus, nid yw hyn yn cael ei werthfawrogi digon nes bod trychineb yn digwydd."