Croesawu aelodau o'r gymuned i Bencadlys HDC am ddigwyddiad gweddïo amlddiwylliannol

Yr wythnos diwethaf gwnaeth Cymdeithas Heddlu Du De Cymru (SWBPA) drefnu digwyddiad Gweddïo Amlddiwylliannol yn y Pencadlys.

Yn bresennol roedd arweinwyr ffydd ac arweinwyr cymunedol o bob rhan o Dde Cymru yn ogystal â chydweithwyr TîmHDC o wahanol ardaloedd ac adrannau. Roedd y digwyddiad yn cynnwys gweddi dros heddwch, goddefgarwch, undod a gobaith o grefyddau Bahai, Bwdhaidd, Cristnogol, Hindŵaidd, Islamaidd, Iddewig a Sikhaidd.

Dywedodd Jason Davies, y Dirprwy Brif Gwnstabl a groesawodd y rhai a fu'n bresennol:

"Rydym yn ymgynnull, nid yn unig fel swyddogion, staff, aelodau o'r gymuned ac arweinwyr ffydd; ond fel teulu unedig, yn dathlu pŵer undod ac amrywiaeth.

"Mae heddiw hefyd yn ein hatgoffa ein bod ni i gyd yn bobl y tu hwnt i'n lifrai, ein rolau a'n gwahaniaethau. Rydym yn rhannu'r un dyhead am heddwch, yr un dymuniad am ddiogelwch, a gobaith; am ddyfodol o gyd-barch a chyd-ddealltwriaeth.

"Rydym yn hynod lwcus yn Ne Cymru i gael cymunedau sy'n llawn diwylliant, credoau a thraddodiadau; mae pob un yn dod â'u lleisiau a'u gweddïau   unigryw eu hunain. Yr her i ni yn Heddlu De Cymru yw cynrychioli'r holl gymunedau a wasanaethwn. Rydym yn gwybod na allwn wneud hyn ar ein pen ein hunain, ac mae digwyddiadau fel hyn yn chwarae rôl hanfodol yn ein partneriaethau. Nid gorfodi yn unig yw diben plismona ond  meithin dealltwriaeth ac empathi.

"Mae'r seremoni hon yn adlewyrchu ein parch mawr at y cymunedau rydym yn eu gwasanaethu ac wrth ddod ynghyd, rydym yn cadarnhau ein gwerthoedd cyffredin, dewrder, uniondeb a thosturi.

"Yn Heddlu De Cymru mae'r bobl yn ymddiried ynom ni i sicrhau eu diogelwch a'u llesiant, waeth beth yw eu cefndir neu eu cred. Ein nod yw atal a chanfod troseddau, diogelu, gwasanaethu a rhoi sicrwydd i'n holl gymunedau a darparu gwasanaethu o'r radd flaenaf i ddioddefwyr.”

Dywedodd Sunita Sood, Goruchwylydd y Ganolfan Gwasanaethau Cyhoeddus a Chyd-Gadeirydd Cymdeithas Heddlu Du De Cymru, a drefnodd y digwyddiad:

"Gyda'n gilydd - yn unedig mewn gweddi ar draws diwylliannau a chredoau, rydym yn dod ynghyd yn un–yn rhannu gweddïau, yn dangos tosturi ac yn creu dyfodol sydd wedi'i wreiddio mewn cynhwysiant.

"Rydym yn hynod ddiolchgar i'n harweinwyr cymunedol, ein harweinwyr ffydd ac aelodau o'n staff a chymunedau amrywiol sydd wedi dod ynghyd mewn undod, myfyrdod a gobaith.

"Mae eich presenoldeb a'ch gweddïau wedi sicrhau bod yr ymgynulliad hwn yn symbol pwerus o heddwch, undod a phwrpas cyffredin."

Mae'r digwyddiad yn un o lawer o ymgysylltiadau gan ein rhwydweithiau i feithrin ymddiriedaeth a dealltwriaeth ledled cymunedau amrywiol De Cymru.