Carcharu dyn o ardal Beddau am dreisio a voyeuriaeth.

Treisiodd Ryan Bonsu, 30 oed, ferch yn ei harddegau yn ei gyfeiriad cartref ar y pryd yn Butetown, Caerdydd ym mis Gorffennaf 2023.
Cafwyd ef yn euog yn dilyn treial yn Llys y Goron Caerdydd a phlediodd yn euog i ddau achos o voyeuriaeth.
Ffilmiodd Bonsu fenywod y gwnaeth gwrdd â nhw drwy apiau caru yn cymryd rhan mewn gweithredoedd rhywiol gydag ef heb yn wybod iddynt a heb gael caniatâd ganddynt.
Ar 11 Mehefin 2025, cafodd Bonsu ei ddedfrydu yn Llys y Goron Caerdydd i ddedfryd estynedig o 14 blynedd a fydd yn cynnwys 10 mlynedd yn y carchar a thrwydded estynedig am bedair blynedd ar ôl hynny.
Mae hefyd yn destun Gorchymyn Atal Niwed Rhywiol am 20 mlynedd a gorchmynion atal yn ei atal rhag cysylltu â'r dioddefwyr.
Fel rhan o'r Gorchymyn Atal Niwed Rhywiol, mae Bonsu wedi'i wahardd rhag defnyddio apiau neu wefannau caru o dan unrhyw enw heblaw am ei enw ei hun.
Mae Gorchmynion Atal Niwed Rhywiol yn adnodd rheoli pwysig er mwyn atal digwyddiadau posibl a diogelu dioddefwyr yn y dyfodol. Pan gaiff y rhain eu torri, byddwn yn sicrhau y bydd troseddwyr yn ymddangos gerbron y llys.
Rhoddodd y dioddefwyr Ddatganiadau Personol Dioddefwyr ac aethant ati'n ddewr i ddisgrifio effaith troseddau Bonsu arnynt:
“Ers i Ryan fy nhreisio, rwyf wedi bod yn cael trafferth cysgu. Rwyf wedi cael hunllefau sydd wedi fy neffro a'i gwneud hi'n anodd i mi anadlu.”
“Ni fyddaf yn gadael i'r hyn y mae Ryan wedi'i wneud fy nhrechu. Bydd yn cymryd amser hir i ddod i delerau â'r hyn y mae wedi'i wneud i mi yn gorfforol ac yn emosiynol.”
“Rwy'n gobeithio y gellir sicrhau cyfiawnder ac y bydd menywod eraill yn cael eu hamddiffyn rhagddo.”
“Hoffwn ddweud pan glywais fy mod i wedi cael fy ffilmio gyntaf, roeddwn i mewn panig ac yn teimlo'n bryderus.”
“Mae'n rhaid i mi fyw gyda'r hyn y mae Ryan wedi'i wneud i mi a magu fy hyder, fy ymddiriedaeth a'm llesiant yn ôl. Rwy'n gwybod y bydd hyn yn cymryd amser.”
Dywedodd y swyddog a fu'n ymwneud â'r achos, y Ditectif Gwnstabl Jamie Dale o Heddlu De Cymru: "Drwy gydol yr ymchwiliad a'r achos llys mae'r dioddefwyr wedi bod yn hynod o gryf.
“Rwy'n gobeithio y bydd y ddedfryd hon yn rhoi rhywfaint o gysur iddynt ac yn eu helpu i symud ymlaen.”
“Nid ydym byth yn diystyru pa mor anodd yw hi i oroeswyr cam-drin rhywiol siarad yn agored a rhoi gwybod am ddigwyddiadau o'r fath.
“Ond rydym yn gobeithio y bydd achosion fel hyn yn rhoi sicrwydd y byddwn yn gwrando ar ddioddefwyr, yn eu trin ag urddas a pharch, ac y byddant yn cael eu cefnogi drwy'r broses farnwrol.”
Os ydych chi wedi cael eich cam-drin yn rhywiol, peidiwch â dioddef yn dawel.
Cysylltwch â Heddlu De Cymru ar-lein neu dros y ffôn yn gyfrinachol:
💻Cysylltwch â ni yn https://www.south-wales.police.uk/cy-GB/riportio/riportio/riportiwch/alpha-v1/v1/treisio-ymosod-rhywiol-troseddau-rhywiol-eraill/
📞 neu drwy ffonio 101.
Ffoniwch 999 bob amser mewn argyfwng.
Gellir dod o hyd i gyfoeth o wybodaeth arall a manylion am wasanaethau cymorth yma.