Anrhydeddau Pen-blwydd y Brenin: MBE i arloeswr o Heddlu De Cymru ym maes dadansoddi

Mae un o aelodau staff Heddlu De Cymru sydd wedi bod yn arloeswr ym maes dadansoddi wedi'i gydnabod gydag MBE yn Anrhydeddau Pen-blwydd y Brenin.

Mae Mike Parry, sy'n Bennaeth Dadansoddi yn Uned Troseddau Cyfundrefnol Rhanbarthol Tarian, wedi'i anrhydeddu am ei wasanaethau i blismona.

Ar ôl graddio o Brifysgol Abertawe, dechreuodd Mike ei yrfa ym maes gwasanaethau cyhoeddus fel swyddog gyda'r adran Safonau Masnach yn Abertawe yn 1984. Yno datblygodd ei ddiddordeb mewn dadansoddi, a'i ysgogi i symud i blismona.

Ers ymuno â Heddlu De Cymru yn 2007, bu Mike yn allweddol wrth ddatblygu adnoddau a phrosesau sydd wedi chwyldroi galluoedd dadansoddol yr heddlu, ac wedi gwella plismona yn y DU a thu hwnt.

Mike oedd yn gyfrifol am system a wnaeth alluogi Heddlu De Cymru i ddarparu data hollbwysig i swyddogion rheng flaen mewn ffordd gyflym ac effeithlon. Cafodd y system hon ei chydnabod yn genedlaethol a rhyngwladol.

Tra roedd ar secondiad i Gyngor Cenedlaethol Prif Swyddogion yr Heddlu, bu Mike yn ymwneud â datblygu'r model sgorio bygythiadau cenedlaethol MoRile. Mae hwn bellach yn cael ei ddefnyddio ym maes gorfodi'r gyfraith yn y DU gyda Mike fel arweinydd Cyngor Cenedlaethol Prif Swyddogion yr Heddlu. Chwaraeodd rôl allweddol hefyd yn natblygiad cychwynnol galluoedd Cronfa Ddata Genedlaethol yr Heddlu.

Gan ddefnyddio'i arbenigedd sylweddol, roedd Mike yn ganolog i greu'r strwythur dadansoddol yn Heddlu De Cymru a helpodd i ddatblygu'r genhedlaeth bresennol o ddadansoddwyr yn yr heddlu. Mae wedi gwasanaethu fel hyfforddwr a mentor i lawer ac wedi cefnogi'r gwaith o ddatblygu Rhaglen Proffesiynoldeb Cudd-wybodaeth genedlaethol ar gyfer dadansoddwyr ac ymchwilwyr yr heddlu. Yn ogystal, creodd Mike y Bwrdd Cenedlaethol Gallu i Ddadansoddi sy'n parhau i wasanaethu fel llwyfan ar gyfer datblygiad a chyfeiriad strategol gwaith dadansoddi'r heddlu drwy Gymru a Lloegr.

Mae Mike, sydd bellach yn uwch-arweinydd yn Uned Troseddau Cyfundrefnol Rhanbarthol Tarian, yn chwarae rhan allweddol wrth fynd i'r afael â Throseddau Difrifol a Chyfundrefnol ar hyd a lled de Cymru. Mae wedi'i gydnabod gan uwch-swyddogion am wella proffesiynoldeb ac effeithlonrwydd Tarian a rhwydwaith ehangach yr Uned Troseddau Cyfundrefnol Rhanbarthol.

Wrth ymateb i'w anrhydedd, dywedodd Mike:

“Rwy'n teimlo'n freintiedig ac yn ddiolchgar i dderbyn MBE am wasanaethau i blismona yn Anrhydeddau Pen-blwydd y Brenin.
“Mae'r rheini sy'n fy adnabod yn ymwybodol pa mor frwdfrydig ydw i ynghylch gwaith dadansoddwyr yr heddlu a'r rôl arwyddocaol maent yn ei chwarae wrth ganfod ac atal troseddau yn ein cymunedau. Rwyf wedi bod yn ffodus drwy gydol fy ngyrfa i helpu i hyfforddi a gweithio gyda rhai o'r dadansoddwyr heddlu gorau yn y DU a thramor.
“Rwy'n ddiolchgar iawn i'm cydweithwyr a'r Pwyllgor Anrhydeddau am ystyried fy mod i'n deilwng o'r gydnabyddiaeth hon.”

Ychwanegodd y Prif Gwnstabl Jeremy Vaughan:

“Mae Mike yn llawn haeddu'r anrhydedd hwn. Ers ymuno â Heddlu De Cymru, mae wedi ymroi ei yrfa i ddatblygu dadansoddeg ym maes gorfodi'r gyfraith.
“Mae cyfuniad unigryw Mike o blismona a gwybodaeth dechnegol, ynghyd â'i gymhelliant a'i angerdd, yn parhau i arwain at arloesedd ar raddfa genedlaethol. Mae Mike yn aelod gwerthfawr iawn o Dîm HDC ac mae'n esiampl ac yn ysbrydoliaeth i'r rheini sy'n gweithio gydag ef. Rwy'n falch iawn iddo fe.”