Carcharu lleidr a oedd yn defnyddio cyllell a gafodd ei adnabod gan ddefnyddio technoleg adnabod wynebau

Llun o Omar Karshe yn nalfa'r heddlu.

Ef yw'r diweddaraf i gael ei ganfod yn euog yn dilyn ymgyrch atal dwyn o siopau ledled Caerdydd
Cafodd siopleidr a oedd yn defnyddio cyllell ei garcharu yn Llys y Goron Casnewydd yn gynharach heddiw.
Roedd Omar Karshe, 44 oed o Spencer Street, Cathays, wedi pledio'n euog i achos o ladrata a bod â chyllell yn ei feddiant mewn man cyhoeddus, yn dilyn digwyddiad ar City Road ym mis Rhagfyr.
Cerddodd Karshe i mewn i siop Tesco Express ar City Road gyda bag siopa gwag. Rhoddodd cwsmer wybod i'r swyddog gwarchod yn y siop amdano am ei bod yn credu ei fod yn dwyn o'r siop. Pan aeth y swyddog ato, rhedodd Karshe i gefn y siop. Ar ôl sylweddoli bod yr allanfa wedi'i blocio, tynnodd gyllell allan o'i boced a rhuthrodd at y swyddog gwarchod, gan fynd yn agos iawn at ei wyneb cyn rhedeg allan o'r siop gyda nwyddau ymolchi wedi'u dwyn.
Cafodd y digwyddiad cyfan ei ddal ar deledu cylch cyfyng, a oedd yn allweddol i ymchwiliad yr heddlu, am i dechnoleg adnabod wynebau ôl-weithredol gael ei defnyddio i adnabod y lleidr.

Cafodd ei arestio yn fuan wedyn, ac wrth chwilio ei gyfeiriad, daeth swyddogion o hyd i'r dillad yr oedd yn eu gwisgo ar ddiwrnod y lladrad.
Aeth ymlaen i bledio'n euog i achos o ladrata a bod â chyllell yn ei feddiant mewn man cyhoeddus, a chafodd ei garcharu am dair blynedd a naw mis yn Llys y Goron Caerdydd ar 11 Mehefin.
Dyma'r euogfarn ddiweddaraf yn dilyn dull gweithredu ehangach newydd o fynd i'r afael â dwyn o siopau gan heddlu Caerdydd a'r Fro.
Ar 30 Mawrth, cafodd Christopher Storer o Caernarvon Way, Trowbridge, ei garcharu am fwy na 40 o droseddau yn ymwneud â dwyn o siopau ledled Caerdydd.
Hefyd ym mis Mawrth, cafodd siopleidr cyson Nathan Cambell o Dyfrig House, Glan yr Afon, ei garcharu am 32 wythnos ar ôl cael ei ganfod yn euog o 19 o achosion o ddwyn o siopau. Ar 13 Mawrth, cerddodd y siopleidr i mewn i Home Bargains ar Heol y Bont-faen pan oedd swyddog eisoes yn y siop, yn gwylio deunydd teledu cylch cyfyng o Cambell yn cyflawni troseddau diweddar. Rhedodd allan o'r siop ond aeth y swyddog ar ei ôl, a chafodd ei arestio.
Dywedodd y Ditectif Gwnstabl James Balchin: “Rydym wedi bod yn cyfarfod â manwerthwyr a busnesau i wella'r broses o rannu gwybodaeth a chudd-wybodaeth yn ogystal ag arestio troseddwyr cyson sy'n elwa o ladrata o siopau.
“Rhoddwyd yr ymgyrch ar waith fel ymateb i'r cynnydd mewn lladrata o siopau a gobeithio bod euogfarnau fel hyn yn helpu i wella ymddiriedaeth a hyder o fewn ein cymunedau busnes.”