Swyddogion yr heddlu yn rhannu profiadau o ddelio â cham-drin domestig

Mae Heddlu De Cymru yn adrodd straeon am gam-drin domestig a thrais yn erbyn menywod a merched drwy lygaid ei swyddogion, wrth iddo lansio ei ymgyrch ddiweddaraf – Ni’n Gweld. 

Mae'r ymgyrch hon yn dilyn ymlaen o ymgyrch ‘Gweld Fi’ yr heddlu, a lansiwyd ym mis Awst 2024. Nod Ni’n Gweld yw annog dioddefwyr trais yn erbyn menywod a merched i ddod ymlaen a rhoi gwybod i ni.

Mae swyddogion o bob rhan o'r heddlu wedi rhannu'r hyn y maent yn ei weld yn y gobaith y bydd dioddefwyr posibl yn adnabod patrymau cam-drin ac yn mynd ati i geisio cymorth neu roi gwybod i'r heddlu.

Gan ddefnyddio asedau digidol, mae'r ymgyrch hefyd yn cynnig cyngor ar roi gwybod am droseddau a sut y bydd y broses yn gweithio, yn y gobaith o rymuso dioddefwyr i gysylltu â'r heddlu.

Dywedodd Prif Gwnstabl Cynorthwyol Heddlu De Cymru, Joanna Maal:

“Drwy ddefnyddio lleisiau ein swyddogion sy'n delio â throseddau yn ymwneud â thrais yn erbyn menywod a merched, ein gobaith yw helpu dioddefwyr i ddeall nad yw'r hyn y maent yn ei wynebu  yn iawn.

“Mae ein swyddogion yn gweithio'n ddiflino i fynd i'r afael â thrais yn erbyn menywod a merched, ac mae'n flaenoriaeth hirdymor i Heddlu De Cymru. 

“Rydym yn cydnabod bod pryderon am ddiogelwch personol a thrais mor gyffredin ag erioed.

“Rydym yn gweld maint ac effaith trais yn erbyn menywod a merched bob dydd ac rydym am dynnu sylw at y materion, rhannu gwybodaeth â'n cymunedau, annog menywod a merched i roi gwybod am ymddygiadau ymosodol neu gael cymorth, ac annog y rhai sy'n gweld ymddygiadau ymosodol i dynnu sylw atynt a'u herio.” 

Mae ymgyrch ‘Gweld Fi’ yr heddlu yn tynnu sylw at brofiadau bywyd menywod a merched ledled De Cymru er mwyn codi ymwybyddiaeth ac annog dioddefwyr i adnabod yr arwyddion a rhoi gwybod i'r heddlu.

I roi gwybod i'r heddlu, ceisio cymorth neu gael rhagor o wybodaeth am yr ymgyrch, ewch i: Ni'n Gweld.