Dyn o Ben-y-bont ar Ogwr wedi'i garcharu am ymosodiad creulon a di-sail ar gymydog oedrannus

Mae dyn 39 oed o Ben-y-bont ar Ogwr a gurodd ei gymydog 78 oed mewn ymosodiad creulon a di-sail wedi cael ei garcharu.

Ymosododd Ashley Morris, o Park Street, Pen-y-bont ar Ogwr, ar ei gymydog oedrannus ar 12 Mawrth a gadawodd ef yn gorwedd mewn pwll o gwaed yn y maes parcio y tu allan i'r bloc o fflatiau ym Mracla lle roedd y ddau ohonynt yn byw.

Roedd y dioddefwr newydd fod i'w siop leol ac wedi parcio ei gar, pan aeth Morris ato a dweud wrtho am ‘wenu nawr’. Pan ofynnodd y dioddefwr beth roedd yn ei olygu, dywedodd Morris wrtho y ‘byddai'n gwneud iddo wenu nawr’, cyn ymosod yn dreisgar arno.

Pwniodd Morris ei ddioddefwr i'r llawr, gan ei ddal i lawr a pharhau i'w bwnio, gan dargedu ei ben a'i wyneb. Yna, ciciodd ef sawl gwaith tra roedd ar y llawr.

Yn waed i gyd, llwyddodd y dioddefwr i godi ar ei draed ar ôl i Morris orffen ymosod arno a gadael y lleoliad. Llwyddodd i gyrraedd tŷ perthynas gerllaw a chysylltodd â'r heddlu.

Cafodd Morris ei arestio yn ei fflat gerllaw yn fuan wedyn – aethpwyd ag ef i'r ddalfa a chafodd ei gyhuddo o achosi niwed corfforol difrifol yn fwriadol. Cafodd ei gadw yn y ddalfa ac aeth ymlaen i bledio'n euog. Ddydd Llun, 15 Medi, cafodd ei garcharu yn Llys y Goron Caerdydd am 42 mis.

Dywedodd y Ditectif Gwnstabl Georgina Prince:

“Ymosododd Ashley Morris yn greulon ac yn barhaus ar ei gymydog oedrannus, a hynny'n gwbl ddi-sail.
“Gadawodd ei ddioddefwr ar y llaw i farw cyn mynd yn ôl i'w fflat, fel pe na bai dim wedi digwydd. Ni fu erioed unrhyw ymdeimlad o edifeirwch.
“Mae'n unigolyn peryglus ac yn haeddu bod yn y carchar, lle na all fod yn fygythiad i eraill mwyach.
“Hoffwn ganmol y dioddefwr yn yr achos hwn a ddangosodd ddewrder eithriadol drwy gydol ei brofiad. Rwy'n gobeithio y bydd yn cael rhywfaint o gysur o wybod y bydd ei ymosodwr yn treulio cyfnod sylweddol o amser yn y carchar.”