Carcharu lleidr cyson o Gaerdydd

Cafodd Martin Burnell, 38 oed o Lanrhymni, ei arestio yn dilyn ymchwiliad helaeth i gyfres o fwrgleriaethau ac achosion o geisio torri i mewn i eiddo ledled Caerdydd rhwng mis Mawrth a mis Mai eleni.

Torrodd Burnell i mewn i gartrefi tra roedd y preswylwyr yno, a byddai fel arfer yn dwyn arian parod ac eitemau gwerth uchel fel gemwaith, gan olygu bod rhai teuluoedd wedi colli eitemau o werth personol.

Ar ôl iddo gael ei gyhuddo, plediodd yn euog i saith bwrgleriaeth a dau ymgais i dorri i mewn i eiddo yn ardaloedd Cyncoed, y Rhath, Llaneirwg, y Rhymni, a Chas-bach, Casnewydd. 

Yn ystod un bwrgleriaeth yn ardal Cyncoed, cafodd menyw 73 oed ei deffro a'i gorfodi i lenwi bag ag eitemau gwerthfawr yn cynnwys gemwaith, a oedd, gyda'i gilydd, yn werth tua £23,000.

Mewn datganiad i'r llys, disgrifiodd y dioddefwr y trawma yr oedd gweithredoedd Burnell wedi ei achosi.

Dywedodd:

“Mae Martin Burnell wedi newid fy mywyd am byth. Ni fyddwn am weld neb arall yn dioddef y nosweithiau di-gwsg, y gorbryder, neu'r diffyg tawelwch meddwl. Rwy'n gobeithio bod cyfiawnder wedi'i wneud, nid dim ond er fy lles i, ond er mwyn atal eraill rhag gorfod wynebu'r un profiad.” 

Cafodd Burnell ei adnabod drwy archwiliad fforensig a deunydd CCTV. Pan gafodd ei arestio yn ei gartref ar 26 Mehefin, daethpwyd o hyd iddo'n cuddio y tu ôl i'r soffa yn yr ystafell fyw.

Cafodd Burnell ei ddedfrydu i naw mlynedd yn y carchar yn Llys y Goron Caerdydd ar 29 Awst.

Dywedodd y Ditectif Ringyll George Buckley o Heddlu De Cymru:

“Rydym yn croesawu dedfryd hir Burnell yn dilyn y gyfres o fwrgleriaethau a gyflawnwyd ganddo eleni.

“Mae wedi achosi llawer o boen a dioddefaint i'r dioddefwyr a'r teuluoedd hynny y mae wedi'u targedu dros y flwyddyn ddiwethaf.

“Gwnaethom weithio'n ddiflino i sicrhau'r canlyniad gorau posibl, ac rydym yn gobeithio y gall y dioddefwyr deimlo rhywfaint o dawelwch meddwl nawr bod cyfiawnder wedi'i wneud.”