Dros 100 o e-feiciau a sgwteri anghyfreithlon yn cael eu hatafaelu yng Nghaerdydd fel rhan o ymgyrch Plismona yn y Gymdogaeth

Fel rhan o ymgyrch wedi'i harwain gan Heddlu De Cymru, cafodd dros 100 o e-feiciau anghyfreithlon eu hatafaelu oddi ar strydoedd Caerdydd, gan sicrhau bod canol ein trefi yn llefydd mwy diogel yr haf hwn.

Yn dilyn pryderon yn y gymuned a chudd-wybodaeth leol, gwnaeth y Tîm Plismona yn y Gymdogaeth gais llwyddiannus am gyllid ychwanegol gan Gomisiynydd yr Heddlu a Throseddu i fynd i'r afael â'r mater yn Nhreganna a Cathays.

Roedd gan yr ymgyrch amlasiantaethol rhwng yr heddlu, Cyngor Caerdydd a'r gwasanaeth Mewnfudo 8 ymgyrch unigol ar waith drwy gydol mis Awst, a oedd yn anelu at fynd i'r afael ag ymddygiad gwrthgymdeithasol.

Atafaelwyd cyfanswm o 135 o MPVs anghyfreithlon a byddant yn cael eu dinistrio'n ddiogel gan Gyngor Caerdydd. Ar gyfartaledd, roedd y beiciau a atafaelwyd wedi cael eu haddasu i gyrraedd cyflymderau yn amrywio rhwng 25 a 70mya– y terfyn cyfreithiol yw 15.5mya.

Cafodd rhai unigolion hefyd eu harestio fel rhan o'r ymgyrch, gan gynnwys:

• Un dyn a gafodd ei arestio am fod â chyffuriau Dosbarth A yn ei feddiant gyda'r bwriad o'u cyflenwi
• Un dyn a gafodd ei arestio am fod â llafn finiog yn ei feddiant

Dywedodd Arolygydd y Gymdogaeth, Tim Ursell:

"Rydym yn ymwybodol o'r perygl sylweddol y mae'r e-feiciau anghyfreithlon hyn yn ei beri i'n cymuned, a'r effaith y maent wedi ei chael ar fusnesau a phreswylwyr lleol.
"Drwy gydol yr wyth ymgyrch, rydym wedi sylwi ar welliannau o ran cydymffurfiaeth defnyddwyr e-feiciau â'r gyfraith, a lleihad sylweddol yn nifer yr unigolion sy'n defnyddio e-feiciau anghyfreithlon ac e-feiciau wedi'u haddasu yn yr ardal.
"Dim ond un rhan o'r camau gweithredu a gymerodd y Tîm Plismona yn y Gymdogaeth lleol drwy gydol yr haf, fel rhan o'r ymgyrch haf mwy diogel, yw hyn, a bydd ymdrechion i fynd i'r afael ag ymddygiad gwrthgymdeithasol yn parhau yn ystod misoedd yr hydref a'r gaeaf."

Dywedodd y Cynghorydd Norma Mackie, Yr Aelod Cabinet dros Wastraff, Strydlun a Gwasanaethau Amgylcheddol yng Nghyngor Caerdydd:

“Fel Cyngor, rydym yn annog pobl i ddefnyddio beiciau ond ni allwn ganiatáu i bobl yrru beiciau anghyfreithlon wedi'u haddasu dros barcdir ac mewn ardaloedd i gerddwyr gan achosi perygl i eraill.
“Roedd pob cerbyd a atafaelwyd gan Heddlu De Cymru yn gallu cyrraedd cyflymderau hyd at 40mya a thu hwnt, ac roedd un beic yn gallu cyrraedd cyflymder uchaf o 84mya, sydd yn peri pryder mawr.
“Mae'r beiciau hyn wedi cael eu haddasu i gyrraedd cyflymderau uchel ond dim ond breciau ar gyfer beic pedalau cyffredin sydd wedi'u gosod arnynt. Maent yn beryglus ac mae angen i ni eu tynnu oddi ar y strydoedd er mwyn sicrhau bod pawb yn ddiogel. Hoffwn ddiolch i Heddlu De Cymru a staff y Cyngor am eu hymgyrchoedd dros yr haf, maent wedi gwneud gwahaniaeth yn barod a'n neges i'r rhai sy'n parhau i ddefnyddio'r beiciau hyn yw y bydd ein hymgyrchoedd yn parhau, ac y byddwn yn atafaelu beiciau ac yn eu dinistrio."