Carcharu dyn o Mayhill am gyflenwi cyffuriau Dosbarth A

Mae dyn o Abertawe wedi cael ei garcharu ar ôl pledio'n euog i ymwneud â chyflenwi cyffuriau Dosbarth A.

Bu Ricky O'Connor, 33 oed o Mayhill, yn destun gwarant chwilio yn ei gyfeiriad cartref ar 13 Awst. Ar ôl i swyddogion fynd i mewn i'r eiddo, cyfaddefodd O'Connor fod ganddo swm o gocên yn ei feddiant yn y cyfeiriad, yn ogystal â dau ffôn symudol a ddefnyddiwyd er mwyn delio'r sylwedd anghyfreithlon.

Atafaelwyd dros £2,250 mewn arian parod hefyd.

Plediodd O'Connor yn euog i fod â chocên yn ei feddiant gyda'r bwriad o'i gyflenwi, bod ag arf ymosodol (sef baton estynadwy) yn ei feddiant mewn lle preifat, bod ag eiddo troseddol yn ei feddiant ac ymwneud â chyflenwi cocên drannoeth y warant.

Mae wedi cael ei ddedfrydu i 30 mis yn y carchar.

Dywedodd y Rhingyll Luke Tucker:

“Mae Ricky O'Connor yn ddyn arall a welodd gyffuriau Dosbarth A fel cynllun “cael cyfoeth sydyn”, ond mewn gwirionedd iddynt fod yn gynllun “mynd i'r carchar yn sydyn”.

“Mae cyffuriau yn bla ar ein cymunedau ac roedd Ricky yn chwarae ei ran yn dod â'r gofid hwn i strydoedd Abertawe.

"Mae'n dechrau ar ei ddedfryd haeddiannol iawn o garchar."

Mae mynd i'r afael â throseddau cyfundrefnol yn flaenoriaeth i Heddlu De Cymru a byddwn yn parhau i fynd ati'n ddiflino i fynd ar ôl troseddwyr er mwyn diogelu ein cymunedau rhag niwed.

Os byddwch yn amau bod rhywun yn delio cyffuriau neu'n poeni bod person ifanc neu blentyn neu oedolyn sy'n agored i niwed wedi cael ei dargedu gan grŵp troseddau cyfundrefnol, rhowch wybod i ni. Nid oes angen i chi fod yn bendant, dim ond yn bryderus.

Ffoniwch ni ar 101, neu gallwch gysylltu â Crimestoppers i roi gwybod yn ddienw os byddai'n well gennych wneud hynny – ar-lein neu drwy ffonio 0800 555 111. Os bydd rhywun mewn perygl uniongyrchol neu os bydd trosedd yn mynd rhagddi, dylech ffonio 999 bob amser.