Robert Williams: Apêl am wybodaeth am leoliad unigolyn yn ei arddegau a aeth ar goll 23 mlynedd yn ôl

Mae apêl ar Crimewatch Live BBC One wedi gofyn i'r cyhoedd am help i ddod o hyd i unigolyn yn ei arddegau a aeth ar goll yng Nghastell-nedd Port Talbot yn 2002.

Gadawodd y bachgen 15 oed, Robert Williams, ei gartref yn Resolfen, Castell-nedd, bron 23 mlynedd yn ôl.

Nid yw ei fam, Cheryl, wedi ei weld ers hynny.

"Nid oes diwrnod yn mynd heibio pan nad ydw i'n meddwl amdano," dywedodd Cheryl wrth Crimewatch Live, a ddarlledodd apêl newydd am wybodaeth yr wythnos diwethaf i geisio dod o hyd i Robert.

"Rwy'n gwybod bod rhywun allan yno yn gwybod rhywbeth. Mae'r person a welodd fy mab yn fyw ddiwethaf allan yno. Felly yr unig beth rydym ei eisiau fel teulu yw'r cyfle i ddod ag ef adref a'i roi i orffwys, fel y byddai unrhyw riant arall am ei wneud."

Wrth siarad ar yr un rhaglen, dywedodd y Ditectif Arolygydd David Butt:

"Mae'r 23 mlynedd diwethaf wedi bod yn hunllef i aelodau teulu Robert. Maent yn haeddu atebion ac mae cymuned Resolfen yn haeddu atebion. Fy mwriad i a'r tîm ymchwilio yw dod o hyd iddo a'i ddychwelyd at ei deulu cyn gynted â phosibl."

Dywedodd y Ditectif Arolygydd Butt y byddai'n hoffi clywed yn arbennig gan unrhyw un a oedd yn bresennol mewn parti mewn tŷ yn Aberdulais nos Sadwrn 23 Mawrth 2002 hyd at oriau mân bore dydd Sul 24 Mawrth 2002, lle roedd Robert yn bresennol.

Os ydych yn gwybod unrhyw beth neu os oes gennych y darn lleiaf o wybodaeth, ni waeth pa mor ddibwys ydyw yn eich barn chi, mewn perthynas â lleoliad Robert, cysylltwch â ni.

Hoffai'r ditectifs glywed gan unrhyw un sydd â gwybodaeth a fydd efallai o gymorth â'u hymoliadau – gellir cysylltu â nhw drwy'r ddolen hon:https://mipp.police.uk/operation/62WH020310C96-PO1

Er mwyn rhoi gwybodaeth yn ddienw, cysylltwch â Crimestoppers ar 0800 555 111 neu drwy
https://crimestoppers-uk.org/give-information/forms/pre-form, gan ddyfynnu'r rhif digwyddiad 2300271756.